ԵՐԵՎԱՆ, 12 փետրվարի — Sputnik. Լիլեհամերում մեկնարկող Ձմեռային պատանեկան օլիմպիական խաղերի բացման արարողության ժամանակ Հայաստանի դրոշակակիրը կլինի դահուկորդ Միքայել Միքայելյանը, հայտնում են ՀԱՕԿ լրատվության բաժնից:
Փետրվարի 12-ին Նորվեգիայի Լիլեհամեր քաղաքում կկայանա երկրորդ պատանեկան օլիմպիական խաղերի բացման պաշտոնական արարողությունը:
Պատանեկան խաղերին այս անգամ մասնակցում է 1100 մարզիկ աշխարհի 71 երկրից: 15-18 տարեկան պատանիները կպայքարեն մեդալների 70 հավաքածուի համար:
Նշենք, որ Հայաստանի մարզական պատվիրակությունն արդեն մեկնել է Լիլեհամեր։ Հայաստանը ներկայացնելու են դահուկորդ Միքայել Միքայելյանը և գեղասահորդ Անաստասիա Գալուստյանը, ով թիմին կմիանա Մոսկվայից:
Հայաստանի մարզական պատվիրակության ղեկավարն է Հայաստանի ազգային օլիմպիական կոմիտեի սպորտի բաժնի պետ Գագիկ Բոլշիկյանը:
Ձմեռային պատանեկան երկրորդ օլիմպիական խաղերը կանցկացվեն նորվեգական Լիլեհամեր քաղաքում, որն իր պատմության ընթացքում երկրորդ անգամ է հյուրընկալում մրցությունը: Դեռևս 1994 թվականին Լիլեհամերն ընդունել էր 15-րդ ձմեռային օլիմպիական խաղերը: 2016 թվականի պատանեկան խաղերը հյուրընկալելու միակ հայտը ներկայացրել էր հենց Լիլեհամերը: 2011 դեկտեմբերի 7-ին պաշտոնապես հայտարարվեց, որ երկրորդ պատանեկան խաղերը կանցկացվեն նորվեգական այս քաղաքում: Լիլեհամերը դարձավ երկրորդ քաղաքն Ինսբրուքից հետո, որը կընդունի ինչպես ձմեռային օլիմպիական խաղերը, այնպես էլ պատանեկան խաղերը:
Լիլեհամերի պատանեկան օլիմպիական խաղերի բացման պաշտոնական արարողության ժամանակ խաղերի կրակը կվառի Նորվեգիայի արքայադուստր Ինգրիդ Ալեքսանդրան, ինչպես իր հայրը՝ թագաժառանգ արքայազն Հաակոնը 1994 թվականի Օլիմպիական խաղերի բացման ժամանակ:
Պատանեկան օլիմպիական խաղերը կեզրափակվեն փետրվարի 21-ին:
