ԵՐԵՎԱՆ, 23 մայիսի — Sputnik. Պաշտպանության բանակի ստորաբաժանումները լիարժեքորեն վերահսկում են իրավիճակը։ Նման համոզմունք հայտնեց ՀՀ պաշտպանության նախարար Սեյրան Օհանյանը։ Լրագրողները նրան խնդրեցին մեկնաբանել նաև ՀՀԿ խմբակցության ղեկավար Վահրամ Բաղդասարյանի` «Կորցրած 800 հեկտարն ամայի տարածք է, և պետք մոռանալ այդ մասին» հայտարարությունը։
«Մարտական գործողությունների ժամանակ՝ լինի պաշտպանողական, թե հարձակողական, լինում է զորքերի տեղաշարժ։ Թաքցնելու բան չկա, եղել է զորքերի որոշակի տեղաշարժ, որն այսօր գտնվում է ՊԲ-ի ստորաբաժանումների վերահսկողության ներքո: Այս տարածքներն ամրագրված են Լեռնային Ղարաբաղի Հանրապետության տարածքներում, և կարծում եմ` բանակցային գործընթացում դրանց համապատասխան ընթացք կտրվի»,-ասաց նախարարը։
Նախարարն ավելացրեց` մենք չենք մոռանում մեր բոլոր պատմական տարածքները, այդ տարածքները նույնպես չենք կարող մոռանալ։
«Դրա համար էլ ստեղծում ենք այնպիսի դիրքային պաշտպանություն, որի վերահսկողությունը՝ ազդեցության առումով, նախաձեռնության առումով, կրակային խոցման առումով, Պաշտպանության բանակի անձնակազմի ներքո լինի»,- ասաց նա։
Նախարարն անդրադարձավ նաև կամավորների վերադարձին։
«Նրանց անհրաժեշտությունն այլևս չկա։ Տարբեր ստորաբաժանումներ լիարժեք իրականացնում են իրենց խնդիրը, նրանք հերթափոխվել են և նորից վերադարձել։ Շնորհակալ եմ նրանց մեր այսօրվա առաջին գծում գտնվող բանիմաց, խելացի, գրագետ հրամանատարների, զինվորների հետ միասին մեր երկրի պաշտպանության, Արցախի պաշտպանության խնդիրն իրականացնելու համար»,-խոսքը եզրափակեց Սեյրան Օհանյանը։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
