ԵՐԵՎԱՆ, 28 մայիսի — Sputnik. Հայաստանում Ռուսաստանի դեսպանատունն արձագանքել է «Analitik.am»-ի տնօրեն Անի Հովհաննիսյանի հայտարարությանը, որում վերջինը շոշափվել է նաև Հայաստանում Ռուսաստանի դեսպան Իվան Վոլինկինի անունը:
«Դեսպանատունը չէր պլանավորել պատասխանել և ինչ-որ մեկնաբանություններ տալ «Analitik.am» կայքի տնօրեն Անի Հովհաննիսյանի հայտարարության մեջ նշված ակնհայտ անհեթեթության առնչությամբ, սակայն քանի որ որոշ ԶԼՄ-ներ, հակառակ պրոֆեսիոնալիզմի և լրագրողական էթիկայի ավանդույթների, անմիջապես տարածեցից անհեթեթ հերյուրանքը՝ դեսպանատունը ստիպված է նշել հետևյալը. առաջին՝ անազնիվ է շահարկման առարկա դարձնել միջպետական հարաբերությունները զուտ քրեական արարքի՝ շանտաժի համար մեղքն իր վրայից գցելու համար»,- նշված է հայտարարության մեջ:
Դեսպանությունը վստահեցնում է, որ Հովհաննիսյանի «հետաքրքրությունների» ոլորտը միայն Ազգային ժողովի պատգամավոր Տիգրան Ուրիխանյանով չի սահմանափակվում:
«Այս առնչությամբ հիշենք խորհրդային ժամանակների սերիական մարդասպան Ա. Չիկատիլոյի հետ կապված դեպքը, որը փորձել է իր գազանային սպանություններն արդարացնել քաղաքական շարժառիթներով՝ իբր «սովետական օկուպացիայի դեմ պայքարով»»,- նշված է հայտարարության մեջ:
«Երկրորդ՝ հետևելով Անի Հովհաննիսյանի տրամաբանությանը՝ նրա կողմից Տիգրան Ուրիխանյանի առնչությամբ կիրառվող «գործակալ» բառը կարելի է կիրառել բոլոր պատգամավորների և քաղաքական գործիչների նկատմամբ, որոնց հետ դեսպանատունը հարաբերություններ է պահպանում և որոնց հրավիրում է ընդունելությունների և իր կողմից կազմակերպվող այլ միջոցառումների:
Երրորդ՝ ՌԴ դեսպանատան աշխատակիցների և, առաջին հերթին, դեսպանի պարտականությունների մեջ է մտնում Հայաստանի հետ հարաբերությունների բազմակողմ զարգացմանն աջակցությունը:
Ինտրիգներ հյուսելը մեր զբաղմունքը չէ, ինչպես ցանկանում է ներկայացնել Անի Հովհաննիսյանը: Սրանով դեսպանատունն իր համար փակված է համարում այս թեման: Վստահ ենք, որ Հայաստանի Հանարապետության իրավապահ մարմինները կպարզաբանեն այս գործը և դատավճիռ կկայացնեն՝ գործող օրենսդրությանը համապատասխան»,- ասվում է Ռուսաստանի դեսպանատան հայտարարության տեքստում:
Analitik.am կայքի տնօրեն Անի Հովհաննիսյան մեղադրանք է առաջադրվել այն բանի համար, որ նա սպառնացել է ԱԺ պատգամավոր Տիգրան Ուրիխանյանի անձի և ընտանիքի մասին վարկաբեկիչ լուրեր գրել, եթե պատգամավորը յուրաքանչյուր ամիս իրենց 300 հազար դրամ չվճարի: Այնուհետև Անի Հովհաննիսյանը հայտարարություն էր տարածել, թե պատվիրատուն եղել է ՌԴ դեսպան Վոլինկինը:
