ԵՐԵՎԱՆ, 6 հունիսի — Sputnik. Նոր ArmPhone ոչ միայն արտադրողի պարծանքն է, այլև ստեղծված է Հայաստանի տնտեսական վիճակը բարելավելու համար, երկուշաբթի լրագրողներին ասաց Technology and Science Dynamics ընկերության նախագահ Վահան Շաքարյանը։
Նա նշեց, որ հայտնի ապրանքանիշների արտադրանքի համեմատ, հայկական սմարթֆոններն ավելի մատչելի են (50 հազար դրամից մինչև 150 հազար դրամ)։
«Մենք մեր արտադրանքի որակը լիովին երաշխավորում ենք ։ Ամենակարևորն այն չէ, թե ինչ ենք մենք արտադրում և ում հետ ենք մրցակցում, այլ այն, որ սա մեր երկրում տնտեսական վիճակը բարելավելու հերթական քայլն է։ Մոտ ապագայում մենք կսկսենք ArmPhone վաճառել Բելառուսում, Ուկրաինայում, Ղազախստանում, Վրաստանում, իսկ հետո ավելի առաջ կգնանք։ Շուտով մենք մեր տաղավարները կունենանք Մոսկվայի Ժողովրդական տնտեսության ձեռքբերումների ցուցասրահում (ՎԴՆԽ)»,- նշեց Շաքարյանը։
Նրա խոսքով` այսօր արդեն կարելի է նոր սմարթֆոնի հինգ տարբեր մոդել գնել` ArmPhone 0502, ArmPhone 0505, ArmPhone 0508, ArmPhone 0509 և ArmPhone 0520.
Հարցին, թե արդյո՞ք դժվար չի լինի բջջային հեռախոսները վաճառել, քանի որ սարքերը դեռ ճանաչում չունեն, Շաքարյանը փիլիսոփայական պատասխան տվեց։
«Երբ մենք ծնվում ենք, մեր մասին ոչ ոք չգիտի։ Տարիքի հետ մեզ սկսում են ճանաչել։ Իսկ որպեսզի քեզ ճանաչեն, դու պետք է տարբերվես որակով։ Որակ մենք ունենք, ժամանակ է հարկավոր», — ասաց Շաքարյանը։
Նա նաև նշեց, որ ԵՏՄ շուկայում պահանջարկ կա, շուկան ուսումնասիրվել է և շարունակում է ուսումնասիրվել։
Սմարթֆոնը տարբերվում է նրանով, որ հայկական ինտերֆեյս, ռինգթոններ և աշխատանքային սեղանի պաստառներ ունի։ Երաշխիքային ժամկետը մեկ տարի է, եթե սմարթֆոնի սեփականատերը հեռախոսը հատակին կամ ջրի մեջ չգցի։ Իսկ եթե սարքը շարքից դուրս գա, ապա այն անվճար կվերանորոգեն։
Ինչ վերաբերում է բջջային սարքերի աքսեսուարներին, Շաքարյանի խոսքով, այդ հարցը դեռ լուծման փուլում է, քանի որ Հայաստանը չունի այնպիսի գործընկերներ, որոնք սարքին համապատասխան աքսեսուարներ կարտադրեն։ Հայ արտադրողները դրանք հավանաբար կներկրեն մյուս երկրներից։
Սպառողը ընտրելու հնարավորություն ունի. հայ արտադրողները ArmPhone-ի մի քանի գունային տարբերակ են ներկայացրել` սպիտակ, սև, արծաթագույն, վարդագույն, կանաչ և երկնագույն։
Մոդելներից մի քանիսը մինչև 32 գիգաբայթ ներքին հիշողություն ունեն, աշխատում են Android 5.1 կամ Android 6.0 օպերացիոն համակարգերով, ունեն 4G կապ, մատնահետքերը ճանաչող հատուկ սարքավորումներ։
