ԵՐԵՎԱՆ, 15 հունվարի — Sputnik. Մնացական Բիչախչյանը նշել է, որ որոշ «իրավապաշտպաններ» ոստիկանության ձեռբերումները կապում են այն հանգամանքով, որ առջևում ընտրություններ են. և ոստիկանությունը իշխանության համար դեռ անելիքներ ունի:
«Ոստիկանության համար ձեռքբերում եմ համարում նաև ոստիկանության ղեկավարությանը ՀՀ նախագահի կողմից շնորհված կոչումները և պարգևները: Հարգելի իրավապաշտպաններ, մի փորձեք ամեն ինչ պղտորել ընտրությունների նախաշեմին անհիմն մեկնաբանություններով: Համենայն դեպս, տեղեկացնեմ ձեզ, որ 2012թ.-ից աշխատում եմ անձնագրային և վիզաների վարչությունում, ուստի և կխոսեմ փաստերով»,- գրել է Բիչախչյանը:
Նա նշել է, որ ոստիկանությունը որպես լիազոր մարմին ընտրական գործընթացներում ունի օրենքով սահմանված իրավասություններ, մասնավորապես, ընտրողների ռեգիստրը վարելու, ընտրողների ցուցակները հրապարակելու գործում:
Ըստ նրա՝ աշխատանքները կատարվել են բարձր մակարդակով և հրապարակային: Արդյունքում, վերջին ընտրությունների ժամանակ ընտրողների վերջնական ցուցակների վերաբերյալ անճշտության վերաբերյալ ոչ մի հաղորդում չի ներկայացվել:
«Տեղեկացնեմ նաև, որ ՀՀ կենտրոննական ընտրական հանձնաժողովի կողմից հաստատված ժամանակացույցի համաձայն ոստիկանությունը հրապարակելու է ընտրողների նախնական ցուցակները, ցեխ շպրտողներին կոչ ենք անում ուժերը խնայել և այդ ուղղությամբ աշխատել, աջակցել ոստիկանությանը հնարավոր անճշտությունները հայտաբերելու հարցում»,- գրել է ՀՀ անձնագրային և վիզաների վարչության պետը:
