ԵՐԵՎԱՆ, 9 հունվարի — Sputnik. Թոշակառուն դիմել է ՀՀ Մարդու իրավունքների պաշտպանին` իր կենսաթոշակի հետ կապված խնդիրները կարգավորելու հարցով։
Ինչպես հայտնում են ՀՀ ՄԻՊ գրասենյակից, ուսումնասիրության արդյունքում պարզվել է, որ 2013 թվականից կենսաթոշակի անցած քաղաքացուն 2017 թվականին ՀՀ աշխատանքի և սոցիալական հարցերի նախարարության սոցիալական ապահովության պետական ծառայությունից ծանուցել են, որ իր ներկայացրած աշխատանքային գրքույկի գրառումները և սոցիալական վճարների մասին տեղեկանքները չեն հիմնավորում նրա աշխատելու փաստը: Արդյունքում նրա ստաժը, հետևաբար նաև կենսաթոշակի չափը նվազեցվել է։
Միաժամանակ, սոցիալական ծառայությունում նրանից պահանջել են հետ վերադարձնել ավել վճարված 200.000 դրամը։
ՄԻՊ աշխատակազմն ուսումնասիրել է քաղաքացու բողոքի հիմքերը, գրություններ են ուղարկվել իրավասու պետական մարմիններին, կատարվել լրացուցիչ ուսումնասիրություններ:
Արդյունքում ՄԻՊ միջամտությամբ վերականգնվել է թոշակառուի աշխատանքային ստաժը, քաղաքացին ազատվել է 200.000 դրամը վերադարձնելու պահանջից։ Ավելին` քաղաքացուն վճարվել է սխալ հաշվարկի արդյունքում շուրջ մեկ տարի պակաս վճարված կենսաթոշակը։