ԵՐԵՎԱՆ, 5 հոկտեմբերի – Sputnik. Հոկտեմբերի 4-ին Տավուշի մարզի Կոթի բնակավայրում զինծառայող է վիրավորվել։ Sputnik Արմենիայի հետ զրույցում այս տեղեկությունը հաստատեց ՊՆ մամուլի խոսնակ Արծրուն Հովհաննիսյանը։
«Վիրավորվածը պայմանագրային զինծառայող Եղիշ Արմենի Չախմախչյանն է։ Նրա կյանքին վտանգ չի սպառնում»,- ասաց նա։
Հովհաննիսյանը հաստատեց սոցցանցերում շրջանառվող լուրերը, որ վերջին օրերին Տավուշի մարզում ադրբեջանական կրակոցների հետևանքով մեկ զինծառայող է մահացել, երեքը վիրավոր են։
Դեռևս անելիքներ կան. ՊԲ զորամասերում արտակարգ դեպքերի առնչությամբ խորհրդակցություն է եղել
Կոթի բնակավայրի ղեկավար Ֆելիքս Մելիքյանը ԶԼՄ–ներին հայտնել է, որ պայմանագրային զինծառայողը վնասվածք է ստացել ուսագոտու շրջանում, նրան տեղափոխել են «Նոյեմբերյանի» բժշկական կենտրոն, այնուհետև Կենտրոնական զինվորական կլինիկական հոսպիտալ։
7000 ժամկետային զինծառայողի սնունդը մատակարարվում է նոր համակարգով. ինչպիսին է արդյունքը
Հիշեցնենք` հոկտեմբերի 1-ին հայ-ադրբեջանական սահմանին հակառակորդի գործողությունների հետևանքով պայմանագրային զինծառայող էր վիրավորվել։ Նա ժամը 22։45–ին աջ ուսային շրջանի հրազենային բեկորային վնասվածքով տեղափոխվել էր Նոյեմբերյանի բժշկական կենտրոն, որտեղից ավելի ուշ` զինվորական հոսպիտալ։
Հոկտեմբերի 2-ին ադրբեջանական կրակոցից Նոյեմբերյանում վիրավորվել էր ինժեներական աշխատանքներ կատարող տրակտորի վարորդը։ ՀՀ պաշտպանության նախարարության մամուլի խոսնակ Արծրուն Հովհաննիսյանը հայտնել էր, որ դեպքը տեղի է ունեցել կեսօրին։ Քաղաքացին վնասվածք էր ստացել որովայնի շրջանում։ Նրան տեղափոխել էին Նոյեմբերյանի հիվանդանոց։
Հոկտեմբերի 3-ին հայ-ադրբեջանական սահմանին Տավուշում հակառակորդի կրակոցից զոհվել էր պայմանագրային զինծառայող Մուշեղ Ժիրայրի Աբովյանը։
