ԵՐԵՎԱՆ, 8 հոկտեմբերի — Sputnik. Ամերիկահայ հեռուստաաստղ Քիմ Քարդաշյանը WCIT 2019 համաժողովին հանդես է եկել խոսքով և պատմել իր բիզնես կայսրության ու մեդիա ոլորտում իր առաջին քայլերի մասին։
«11 տարեկանից գիտեի, որ նկարահանվելու եմ ռեալիթի շոուում։ Պատանեկան տարիներին դիտում էի հեռուստատեսությամբ հեռարձակվող բոլոր շոուները և երազում սեփականն ունենալու մասին։ Այսօր աշխատում եմ այդ ոլորտում և չեմ կարող ինձ ավելի երջանիկ պատկերացնել, քան այսօր եմ»,–ասել է գործարարը։
Քարդաշյանը պատմել է, որ հաջողության է հասել փորձելու և սխալվելու ճանապարհով` սովորելով սեփական սխալների վրա։
«Իմ կարիերայի սկզբում ես մինչև վերջ չէի գիտակցում անձնական կյանքի կարևորությունը։ Ինձ թվում էր, որ մարդիկ կարող են իմ մասին իմանալ ամեն ինչ, և դա ինձ համար խնդիրներ չի առաջացնի։ Սակայն ժամանակի ընթացքում ես մեծացա, ծնվեցին երեխաներս, և ես սկսեցի դրան ավելի ուշադիր վերաբերվել։ Օրինակ, երեկ գիշեր դուստրս ինձ արթնացրեց և խնդրեց պարային երեկույթ կազմակերպել։ Իհարկե, ես դա կարող էի համացանցում տեղադրել, սակայն չարեցի։ Ոչ այն պատճառով, որ վատ եմ պարում (ծիծաղում է), այլ այն պատճառով, որ ցանկանում եմ անձնական և հանրային կյանքի միջև հավասարակշռություն պահպանել»,–անկեղծացավ Քիմը։
Նա սոցցանցերում լայքերի քանակի և վերատարածման մասին չի մտածում։ Նման բաների մասին նա մտածում է միայն բիզնեսի շրջանակում։ Քիմի կարծիքով` հաջող բիզնեսի համար կարևոր է անձամբ ամեն ինչ վերահսկելը։
«5 աշխատակից ունեմ, մարքեթինգի և բիզնեսի վարպետ, որոնց հետ հանդիպում ենք ամեն շաբաթ։ Սակայն ինձ համար կարևոր է վերահսկել բոլոր մանրուքները` դիմահարդարման նոր արտադրանքի գույնից մինչև փաթեթավորում։ Ես պետք է նայեմ արտադրանքին և տեսնեմ, որ դա բացարձակապես իմ ստեղծածն է»,–պատմել է Քիմը։
«Լավ է լինել տանը». ամերիկահայ միլիոնատեր Օհանյանը հայերեն մի քանի բառ արդեն գիտի
Քարդաշյանը հայտնել է, որ հատուկ օրացույց ունի, որտեղ նշում է իր նոր արտադրանքի թողարկման օրը։ Հաճախ գաղափարները նրա մտքում են լինում, սակայն հստակ դեդլայներով նա ինքն իրեն մոտիվացնում է աշխատելու համար։ Հեռուստաաստղը նաև ուրախացրել է WCIT 2019–ի ունկնդիրներին, ասելով, որ մտադիր է համալրել իր հավաքածուն ևս 4 արտադրանքով, որոնք ստեղծելու համար ոգեշնչվել է Երևանում զբոսնելիս։
Համաշխարհային աստղ Քիմ Քարդաշյանը Երևան է ժամանել` մասնակցելու WCIT 2019–ին, որն անցկացվելու է հոկտեմբերի 6-9–ը։ Քարդաշյանը համաժողովին մասնակցում է որպես հատուկ զեկուցող և մոդերատոր։
