ԵՐԵՎԱՆ, 30 հոկտեմբերի – Sputnik. ՀՀ վարչապետ Նիկոլ Փաշինյանն անդրադարձել է ԱՄՆ ներկայացուցիչների պալատի` Հայոց ցեղասպանությունը ճանաչող բանաձևին և Facebook սոցիալական ցանցի իր էջում նշել դրա կարևորությունը։
«Սա կարևոր քայլ է Հայոց ցեղասպանության միջազգային ճանաչման և ցեղասպանությունների գլոբալ կանխարգելման գործում: Ոգեկոչենք Մեծ եղեռնի մեկուկես միլիոն անմեղ զոհերի հիշատակը»,– գրել է նա:
Վարչապետի մամուլի ծառայության հրապարակած հաղորդագրության մեջ էլ նշվում է, որ բանաձևը հզոր քայլ է պատմական արդարության ու ճշմարտության ուղղությամբ, որը նաև մխիթարանք է հաղորդում Հայոց ցեղասպանությունից փրկվածների ժառանգներին։
«Ընդունեք իմ սրտանց շնորհավորանքներն ու հիացմունքն ուղղված ամերիկահայերի սերունդներին, ում անձնազոհ քաղաքական և հասարակական գործունեությունն ու հաստատակամությունն էին այս պատմական քվեարկության շարժիչ ուժը և ոգևորությունը։ Այլևս երբեք»,– նշել է Փաշինյանը։
ԱՄՆ Կոնգրեսի ներկայացուցիչների պալատում քվեարկությունը կայացել է հոկտեմբերի 29-ին։ 405 կողմ, 11 դեմ, 3 ձեռնպահ քվեարկությամբ ԱՄՆ ներկայացուցիչների պալատն ընդունել է Հայոց ցեղասպանությունը ճանաչող բանաձևը:
Հիշեցնենք` ավելի վաղ ամերիկահայ հեռուստաաստղ Քիմ Քարդաշյանը ներկայացուցիչների պալատից պահանջել էր ճանաչել Հայոց ցեղասպանությունը։
«Իրականում». Հայոց ցեղասպանության փաստը ամերիկացիները կրկին շահարկում են
