ԵՐԵՎԱՆ, 12 նոյեմբերի — Sputnik. Ջրօգտագործողների ընկերությունների ու միությունների տնօրենները պետք է ունենան բարձրագույն կրթություն։ Այսպիսի օրենսդրական նախաձեռնությամբ է հանդես եկել ԱԺ «Բարգավաճ Հայաստան» խմբակցության պատգամավոր Միքայել Մելքումյանը։
«Մեր վերլուծություններն ու տվյալները ցույց են տալիս, որ կան և՛ բարձրագույն կրթություն չունեցող, և՛ մասնագիտական փորձ չունեցող մարդիկ։ Կան նաև մարդիկ, որ սովետական կոմիսարների ձևով նշանակվել են այնտեղ։ Հիմա ժամանակն է, որ մենք գոնե նվազագույն պահանջներ սահմանենք այդ ընկերությունների ղեկավարների նկատմամբ։ Առայժմ տեղակալների մասին չենք խոսում»,– ասաց Մելքումյանը` նախագիծը ներկայացնելիս։
Մեկ այլ խստացում էլ առաջարկվում է աշխատանքային փորձի վերաբերյալ։ ՋՕԸ տնօրենը պետք է ունենա առնվազն մեկ տարվա մասնագիտական աշխատանքային փորձ կամ 3 տարվա աշխատանքային փորձ` այլ ոլորտների ղեկավար պաշտոններում։
Մելքումյանը նաև նշեց, որ արդեն աշխատող տնօրենների վրա նոր օրենքը չի տարածվի` մինչև պայմանագրով սահմանված ժամկետի ավարտը։
Հարցի քննարկման ժամանակ պատգամավորները նիստին ներկա ՀՀ Ջրային կոմիտեի նախագահ Վարդան Մելքոնյանից հետաքրքրվեցին, թե ներկա պահին ՋՕԸ–ներից քանիսն ունեն բուհական կրթությամբ ղեկավարներ։
Կոմիտեի նախագահը հայտնեց, որ գործող 15 ընկերություններից միայն 5-6–ի ղեկավարներն ունեն բարձրագույն կրթություն։
Ի դեպ, ԲՀԿ առաջարկին իշխանությունը և, մասնավորապես, Ջրային կոմիտեն ևս դեմ չեն։ Վարդան Մելքոնյանի համոզմամբ` ժամանակն է բարձրացնելու այդ կառույցների ղեկավարների մասնագիտական որակները։
Նշենք, որ Ջրօգտագործողների ընկերությունների և ջրօգտագործողների ընկերությունների միությունների մասին ՀՀ օրենքն ընդունվել է 2002 թվականին, և առաջին ՋՕԸ–ները Հայաստանում ձևավորվել են 17 տարի առաջ։
