ԵՐԵՎԱՆ, 25 նոյեմբերի - Sputnik. ԱԺ արտաքին հարաբերությունների մշտական հանձնաժողովն այսօր` նոյեմբերի 25–ին, դրական եզրակացություն տվեց «Հայաստանի Հանրապետության կառավարության և Չինաստանի Ժողովրդական Հանրապետության կառավարության միջև սովորական անձնագրեր կրող անձանց համար մուտքի արտոնագրի պահանջի փոխադարձաբար վերացման մասին» համաձայնագրի վավերացման նախագծին։
Ու՞ր մեկնել, եթե վիզա ստանալու ժամանակ ու նյարդեր չունեք. թոփ 5 երկրներ
Համաձայնագրի քննարկման ժամանակ ՀՀ ԱԳ փոխնախարար Ավետ Ադոնցը ներկայացրեց վիճակագրություն, ըստ որի` 2018թ. հունվար-հոկտեմբեր ընկած ժամանակահատվածում Չինաստանից Հայաստան է այցելել Չինաստանի 8 430 քաղաքացի, իսկ 2019թ–ին` շուրջ 14 500։
«Այսինքն` տուրիզմի առումով մենք բավական հետաքրքիր դինամիկա ենք ապրում Չինաստանի հետ։ Իհարկե, ցուցանիշները ցածր են, բայց տեմպերը բավականին բարձր են։ Սա այն պայմաններում, երբ, այնուամենայնիվ, առ այսօր գոյություն ունի վիզային ռեժիմ»,–ասաց Ադոնցը` հույս հայտնելով, որ մուտքի վիզաների վերացումը դրական կազդի ոչ միայն տուրիզմի ցուցանիշների, այլև մշակութային հարաբերությունների ակտիվացման վրա։
Ավետ Ադոնցը հայտնեց, որ նոր համաձայնագրով նախատեսվում է, որ երկու երկրների քաղաքացիները կազատվեն մուտքի արտոնագրի պահանջից` միմյանց երկրների տարածք մինչև 90 օր ժամկետով մուտք գործելիս։
Դրանից ավելի երկար ժամկետի, օրինակ` աշխատելու կամ որևէ գործունեությամբ զբաղվելու, սովորելու, բնակվելու դեպքում, քաղաքացիները պարտավոր են դիմել մուտքի արտոնագիր ստանալու համար:
Ամերիկյան վիզա ստանալու հարցում իրավիճակը կարող է ցանկացած պահի փոխվել. հայտարարություն
Ի դեպ, համաձայնագիրը որոշ վերապահումներ ունի։ Այն վերաբերում է Չինաստանի ամբողջ տարածքին, բացառությամբ` Հոնկոնգի և Մակաոյի։ Այս շրջանների համար գործելու են այլ իրավակարգավորումներ։
«Հայաստանի Հանրապետության կառավարության և Չինաստանի Ժողովրդական Հանրապետության կառավարության միջև սովորական անձնագրեր կրող անձանց համար մուտքի արտոնագրի պահանջի փոխադարձաբար վերացման մասին» համաձայնագրի վավերացման նախագիծն առաջիկայում կներառվի ՀՀ ԱԺ լիագումար նիստերի օրակարգում։
