ԵՐԵՎԱՆ, 5 մարտի — Sputnik. Կառավարության այսօրվա նիստի ժամանակ ՀՀ վարչապետ Նիկոլ Փաշինյանը զայրացավ, քանի որ դեռ մեկ տարի առաջ հանձնարարական է տվել, որ պետական կառույցներում առկա սարքերի համար մրցույթ հայտարարվի, սակայն մինչ օրս հանձնարարականը չի կատարվել։
Հայաստանը հեղափոխությունից հետո սկսել է ավելի շատ գումար վճարել ԵԱՏՄ բյուջե
Փաշինյանը դիմեց իր աշխատակազմի ղեկավար Էդուարդ Աղաջանյանին` հետաքրքրվելով, թե ի՞նչն է պատճառը, որ մինչ օրս տարբեր գերատեսչություններում տեղադրված վճարումների, սուրճի ապարատներ կան, որոնց համար մրցույթ չի անցկացվել։
«Ես տեղեկանում եմ, որ իմ` մեկ տարի առաջ տված հանձնարարականից հետո դեպք է եղել, որ ուղիղ գնում է եղել նման սարքի։ Ես տեղեկացել եմ, որ այդ ապարատները տեղադրելու համար պետությանը ոչ մի վճարում չի իրականացվում։ Բայց կարծում եմ, որ պետք է մրցույթ հայտարարենք ու վարձավճար վերցնենք»,–ասաց վարչապետը։
Ի պատասխան Աղաջանյանը հայտնեց, որ վերոնշյալ խնդիրը 1-2 ուժային մարմիններում կա, քանի որ նախկինում գոյություն ունեցող համապատասխան կարգավորում է եղել, կառավարության որոշում է եղել։ Սակայն, ըստ Աղաջանյանի, արդեն իսկ հանձնարարական է ուղարկել այդ մարմիններին խնդրի լուծման համար։
Փաշինյանին չբավարարեց Աղաջանյանի պատասխանը, և վարչապետը նշեց, որ եթե անգամ կառավարության որոշում կա, որ այդ սարքերի համար չպետք է գումար վերցնեն, ապա պետք է փոխվի այդ որոշումը։
«Մեծ պրոբլեմ է, երբ ես հանձնարակական եմ տալիս, սակայն դրանից մեկ տարի հետո իմանում եմ, որ դա կատարված չէ։ Սա ի՞նչ է նշանակում։ Այսինքն` ինչ–որ տեղ իմ հանձնարակականից դուրս գաղտնի բանե՞ր են կատարվել։ Հրապարակավ ասում եմ` բոլոր այն գերատեսչություններում, որտեղ տեղադրված են ապարատներ, բոլոր այդ ծառայությունների համար ամենակարճ ժամկետում պետք է մրցույթ հայտարարվի»,–ասաց Փաշինյանը։
Լինել թափանցիկ ու վստահելի. իշխանությունը որոշել է` ինչպես ծախսել բյուջեն մինչև 2023թ.–ը
Պետական գույքի կառավարման կոմիտեի նախագահ Նարեկ Բաբայանի նկատառմանը, թե աստիճանաբար փոխում են այդ սարքերն ու մրցույթով հաղթածներինը տեղադրում` Փաշինյանն արձագանքեց` աստիճանաբար պետք չի փոխել, անհրաժեշտ է միանգամից փոխել։
Վարչապետի խոսքով` պետք է ռազմավարություն մշակեն, թե ինչ անեն, որ իր հանձնարակականներին երրորդ, չորրորդ կամ հինգերորդ անգամ չանդրադառնան։
Նիկոլ Փաշինյանը կկարողանա փակել պետական ապարատի կոռուպցիոն ախորժակը
