ԵՐԵՎԱՆ, 17 մարտի – Sputnik. ԱԺ ֆինանսավարկային և բյուջետային հանձնաժողովի նիստում այսօր զավեշտալի դեպք տեղի ունեցավ։
Հանձնաժողովի և Հայաստանի գիտակրթական ՀԿ-ների միջև համագործակցության հուշագրի շրջանակում գործողությունների պլանի նախագծի քննարկման ժամանակ հարցի զեկուցող տնտեսագետ, «Տնտեսական իրավունքի կենտրոն» ՀԿ-ի նախագահ Մովսես Արիստակեսյանը փորձեց խոսքը սկսելուց առաջ հանել բժշկական դիմակը։
Հանձնաժողովի նախագահ Մանե Թանդիլյանը, որը ևս դիմակով էր մասնակցում նիստին, թույլ չտվեց՝ ասելով. «Հավատացնում են ձեզ՝ հեշտ է` իմ փորձից ելնելով»։
Թանդիլյանը նաև տեղեկացրեց, որ Արիստակեսյանը եկել է ռիսկային գոտուց։
«Պարոն Արիստակեսյանը, լինելով ռիսկային գոտում, միացել է մեզ։ Ես պետք է խնդրեմ` ըմբռնումով մոտենաք։ Պարոն Արիստակեսյանը հարցը կզեկուցի 3-5 րոպեի ընթացքում, որից հետո ինքը կարող է գնալ։ Իսկ մենք կշարունակենք մեր աշխատանքը»,- ասաց Թանդիլյանը։
Արիստակեսյանը ստիպված հարցը զեկուցեց բժշկական դիմակով, ինչն ակնհայտորեն դժվարացնում էր նրա շնչառությունը։
Հարցը վերաբերում է մասնավորապես բյուջեի նախագծերի ու դրանց կատարողականի քննարկման ժամանակ հանձնաժողովի անդամներին տրվող մասնագիտական խորհրդատվությանը։
«Մենք պատրաստվում ենք օգնել հանձնաժողովին մասնագիտական խորհրդատվություններով բյուջեի նախագծերի քննարկման ժամանակ, որպեսզի ճիշտ հասկանաք բյուջեի նախագիծն ու դրա կատարման ընթացքը։ Նախատեսում ենք նաև ներկայացնել բյուջեի համալրմանն ուղղված ֆիսկալ բնույթի առանձին նախագծեր»,- ասաց Արիստակեսյանը։
Զեկուցումից և զեկուցողին ուղղած մի քանի հարցերից հետո հանձնաժողովի և 9 ՀԿ- ների համագործակցության գործողությունների պլանը հաստատվեց միաձայն քվեարկությամբ, և Մովսես Արիստակեսյանը հեռացավ ԱԺ-ից։
Մարտի 16-ի երեկոյան երկրում արտակարգ դրություն հայտարարվեց, որը կտևի մինչև ապրիլի 14-ը։ Այս պահին Հայաստանում կա կորոնավիրուսով վարակվելու 52 հաստատված դեպք։
Աշխարհում կորոնավիրուսով վարակվածների թիվը գերազանցել է 182 հազարը. մարտի 17–ի տվյալներ
