ԵՐԵՎԱՆ, 6 մայիսի — Sputnik. ՀՀ ԱԺ դահլիճ մտնող պատգամավորներին ու կառավարության անդամներին այսօր առավոտյան նիստերի դահլիճ մուտք գործելիս ԱԺ աշխատակազմը ռետինե ձեռնոցներ ու դիմակներ է բաժանել:
ԱԺ «Լուսավոր Հայաստան» խմբակցության ղեկավար Էդմոն Մարուքյանը նիստի ընթացքում ԱԺ նախագահ Արարատ Միրզոյանից հետաքրքրվեց, թե ինչով են պայմանավորված այդ խստացումները:
«Աշխարհում, այդ թվում՝ Հայաստանում, կա այդպիսի նոր տիպի համաճարակ՝ կորոնավիրուսով պայմանավորված, և այնպես է ստացվել, որ, ասում են, ձեռնոցներն ու դիմակները որոշակի տոկոսով կարող են կանխել այդ վարակի տարածումը»,- ի պատասխան Մարուքյանի հարցին` ասաց ԱԺ նախագահ Արարատ Միրզոյանը՝ առաջացնելով նիստին ներկա պատգամավորների ծիծաղը:
Ապա ավելի լուրջ հայտնեց, որ կա հիմնավոր կասկած, որ ԱԺ աշխատակիցներից մեկը կարող է վարակված լինել:
«Եվ քանի դեռ այդ հանգամանքները լիովին չեն պարզվել, ստիպված ձեռնարկում ենք անվտանգության կամ կանխարգելիչ միջոցառումներ»,- ասաց Միրզոյանը:
ԱԺ նախագահը հայտարարեց նաև, որ բոլոր այն պատգամավորների համար, որոնք կորոշեն իրենց ու իրենց հարազատների ընտանիքների անվտանգության համար նիստերին չմասնակցել, բացակայությունները կհամարվեն հարգելի:
Հավելենք, որ ArmDaily.am-ի տեղեկություններով՝ կոնտակտավոր անձը «Իմ քայլը» խմբակցության պատգամավոր Նազելի Բաղդասարյանն է: Պատգամավորն այսօր ներկա չէր քառօրյայի նիստին: Նա ԶԼՄ–ի հետ զրույցում չի հերքել տեղեկությունը և նշել է, որ այժմ ինքնամեկուսացված է:
Աշխարհում կորոնավիրուսով վարակվածների թիվը գերազանցել է 3,7 միլիոնը. Ռուսաստանը 7–րդն է
