ԵՐԵՎԱՆ, 6 մայիսի — Sputnik, Կարինե Հարությունյան. Երբ մարդը կյանքից զրկում է իր երեխաներին, իսկ հետո նաև իրեն վնասում, ապա նման դեպքերի 90 տոկոսում այդ քայլին գնացողները հոգեկան առողջության շեղումներ են ունենում։ Sputnik Արմենիայի հետ զրույցում նման կարծիք հայտնեց հոգեբան Արկադի Մեհրաբյանը` անդրադառնալով երեկ` մայիսի 5–ին, Երևանում տեղի ունեցած դաժան ու ողբերգական դեպքին։
Ըստ նախնական տեղեկությունների` տղամարդը տան պատուհանից՝ շենքի 9-րդ հարկից, դուրս է նետել իր 8–ամյա որդուն և 5–ամյա դստերը, ապա նաև ինքն է նետվել:
«Մարդու կյանքն ու առողջությունն իր ենթագիտակցության համար ամենաթանկ բանն են, և երբ փորձում են իրենց վնասել, ավտոմատ ինքնապաշտպանական ռեակցիան միանում է։ Եթե մարդու մոտ բնազդը հաղթում է, ուրեմն ինչ–որ բան այն չէ»,–ասաց Մեհրաբյանը։
Նրա խոսքով` հոգեպես առողջ մարդը միայն այն պարագայում կարող է նման քայլի գնալ, եթե աֆեկտի տակ է, և գիտակցությունն անջատված է։ Իսկ մարդուն աֆեկտի կարող է հասցնել ծանր հարվածը` կորուստը, կյանքին սպառնացող վտանգը։ Մյուս կողմից, աֆեկտը նաև պաշտպանողական ռեակցիա է առաջացնում։ Այսինքն` աֆեկտի ժամանակ ագրեսիա առաջանում է, սակայն ոչ ինքդ քո անձի հանդեպ։
Իսկ ինչ վերաբերում է հոգեկան խնդիրներին, ապա մասնագետը նշեց, որոշ դեպքերում դրանք նոպայաձև են դրսևորվում։ Շրջապատի մարդիկ տվյալ դեպքերում կարող է և չնկատեն, որ դիմացինն ինչ-որ շեղումներ ունի։
Գրկել է աղջկան ու նետվել. հարևանները պատմում են երևանյան սարսափելի դեպքի մանրամասները
Հոգեբան Սամվել Խուդոյանն էլ իր հերթին նշեց, որ լիակատար, սթափ գիտակցություն ունեցող մարդը չի կարող նման քայլի գնալ։ Նրա խոսքով`տղամարդը կա՛մ հոգեկան զառանցական նոպայի ազդեցության տակ է եղել, կա՛մ կրոնական ինչ-որ պատկերացումների։
«Նույնիսկ թմրանյութերի, ալկոհոլի ազդեցության տակ մարդը նման քայլի չի գնում։ Իհարկե, հետաքննությունը կբացահայտի մանրամասները, սակայն նման քայլի մարդիկ գնում են զառանցական ինչ-որ մտքերի ազդեցությամբ։ Վարկածները, թե կինը կարող է երեխաներին սրած լիներ ամուսնու դեմ, նրանք կարող է կոպիտ են խոսել հոր հետ` անհիմն են. այդ պատճառները չէին կարող նման քայլի հանգեցնել»,–ասաց Խուդոյանը։
Հոգեբանը կարծում է, որ այս քայլն անգամ կնոջը պատժելու միջոց չպետք է համարել, այն չի կարող լինել նաև դեպրեսիայի, ֆինանսական խնդիրների հետևանք։ Խուդոյանի համոզմամբ` երբ մարդը զրկում է երեխաներին կյանքից ու նաև իրեն վնասում, ուրեմն զառանցական մտքերով է տարված։
Հիշեցնենք, որ երեկ Sputnik Արմենիային տղամարդու հարևանները պատմել էին, որ նրան հաճախ էին տեսնում բակում երեխաների հետ խաղալիս կամ խանութից վերադառնալիս։ Հարևանների խոսքով` տղամարդը վատ սովորություններ չի ունեցել` չի խմել, թմրանյութ չի օգտագործել։ Նրա մոտ նաև հոգեկան շեղումներ չեն նկատվել։
Դեպքի առթիվ ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի (սպանություն) 2-րդ մասի 1-ին կետով և 110-րդ (ինքնասպանության հասցնելը) հոդվածի 1-ին մասով:
