ԵՐԵՎԱՆ, 24 մայիսի — Sputnik. ՀՀ վարչապետ Նիկոլ Փաշինյանը Facebook սոցիալական ցանցի ուղիղ եթերի ժամանակ հայտնեց, որ շուտով պարետը որոշում կհրապարակի, ըստ որի` մի շարք վայրերում դիմակ կրելը պարտադիր կլինի։
«Մեր մասնագետների ուսումնասիրության համաձայն` դիմակի կրման մշակույթը մեզ հնարավորություն կտա զրոյացնել դեպքերը։ Դա, սակայն, կախված է նաև դիմակի որակից և դիմակի` որակյալ կրելուց։ Որոշում է կայացվել, որ առևտրի բոլոր մասնակիցները` գնորդն ու վաճառողը, պետք է դիմակ կրեն»,–ասաց Փաշինյանը։
Նրա խոսքով` ավտոմեքենաների մեջ նույնպես մեկից ավելի մարդու առկայության պարագայում բոլորը պետք է դիմակ կրեն։ Վերոհիշյալ երկու դեպքերում դիմակ չկրողները վարչական պատասխանատվության կենթարկվեն։
Վարչապետը վստահեցնում է` եթե դիմակ կրելու և ձեռքերի ախտահանման կանոնը պահենք, ապա կզրոյացնենք կորոնավիրուսի տարածման աստիճանը։
Նա նշեց` գիտի, որ շատերի համար ամեն օր դիմակ գնելը ֆինանսական բեռ կարող է լինել, ինչի համար էլ շուտով մասնագետները կպատմեն, թե ինչպես կարող են տնային պայմաններում էլ դիմակ պատրաստել։
Հիշեցնենք, որ պարետի որոշմամբ մայիսի 18–ից առանց դիմակ չի թույլատրվում տրանսպորտ, մետրո, անգամ մարզասրահ մտնելը։ Իսկ բաց տարածություններում մարդիկ կարող են դիմակ չկրել, սակայն պարտավոր են իրենց մոտ այն ունենալ։ Իսկ մայիսի 25-ից դիմակ կրելը բոլոր փակ տարածքներում դառնում է պարտադիր:
Հայաստանում կորոնավիրուսից 1 կին և 3 տղամարդ են մահացել
Վերջին մեկ օրում ունենք կորոնավիրուսային հիվանդությամբ հաստատված 359 նոր դեպք և 128 առողջացած. ունեցել ենք նաև մահվան 4 դեպք։ Ընդհանուր առմամաբ Հայաստանում 6661 մարդ է կորոնավիրուսով վարակվել։
