ԵՐԵՎԱՆ, 4 հուլիսի — Sputnik. Երևանում կանխել են երիտասարդ կնոջ ինքնասպանության փորձը։ Sputnik Արմենիայի տեղեկություններով` երեկ` հուլիսի 3–ին, ժամը 19-ի սահմաններում, Արաբկիր վարչական շրջանի Հակոբ Հակոբյան փողոցի իր բնակարանից շտապօգնության մեքենայով թիվ 1 համալսարանական հիվանդանոց է տեղափոխվել 32-ամյա մի կին։ Նրա ձախ ձեռքի դաստակի երակները կտրված են եղել։ Նրան անմիջապես տեղափոխել են վիրահատարան։
Մոտ երկու ժամ տևած վիրահատության արդյունքում բժիշկներին հաջողվել է փրկել կնոջ կյանքը։
Ըստ շրջանառվող լուրերի՝ կինը փորձել է կյանքին վերջ տալ՝ դանակով կտրելով երակները։ Վնասվածքը բավական խորն է եղել․ դանակի շեղբը գրեթե հասել է ոսկորին։ Մեր տեղեկություններով՝ 1-03 է ահազանգել կնոջ հարազատներից մեկը, որը պատահաբար այցելել է նրա բնակարան ու տեսել, որ նա կտրել է երակները։ Հարևաններն ասում են, որ կինը միայնակ է ապրում, նա հանգիստ բնավորության տեր մարդ է, իսկ թե ինչու է դիմել այդ ծայրահեղ քայլին` կպարզեն իրավապահները։
