ԵՐԵՎԱՆ, 16 հուլիսի — Sputnik. Գեղարքունիքում տեղի ունեցած ավտովթարի հետևանքով «Գազելի» վարորդը տեղում մահացել է, իսկ «ԶԻԼ»–ի վարորդը` հոսպիտալացվել Գավառի ԲԿ։ Բժիշկները տուժածի առողջական վիճակը գնահատել են բավարար:
Ինչպես հայտնում է ԱԻՆ պաշտոնական կայքը, հուլիսի 16-ի գիշերը` ժամը 02:06-ին, «911» ծառայությանն ահազանգ է ստացվել, որ Գեղարքունիքի մարզի Հայրավանք գյուղի մոտակայքում տեղի է ունեցել ՃՏՊ։
Դեպքի վայր մեկնած հրշեջ-փրկարարական ջոկատը պարզվել է, որ Սևան-Մարտունի ավտոճանապարհի 24-րդ կմ-ին բախվել են «ԳԱԶել» (վարորդ՝ Ա.Մ., ծնված 1976 թ.) և «ԶԻԼ» (վարորդ՝ Ա.Խ. ծնված 1995 թ․) մակնիշների ավտոմեքենաները: Պատահարի հետևանքով «Գազելի» վարորդը տեղում մահացել է, իսկ Ա.Խ.-ն հոսպիտալացվել է Գավառի ԲԿ, որտեղ բժիշկները տուժածի առողջական վիճակը գնահատել են բավարար:
Shamshyan.com կայքը հայտնում է, որ վթարի հետևանքով մահացած վարորդը Գեղարքունիքի մարզի Վանևան գյուղի բնակիչ՝ 43-ամյա Արմեն Մանուկյանն է, «Զիլ»–ի վարորդը` Գավառ քաղաքի բնակիչ 24-ամյա Ազնավուր Խաչատրյանը։
Կայքի տեղեկություններով` բախման հետևանքով քարերով բարձված բեռնատարը կողաշրջվել է, իսկ «Գազելը» վերածվել է մետաղե ջարդոնի։
Փաստի առթիվ Գավառի քննչական բաժնում հարուցվել է քրեական գործ։
