Օրենքի պահանջով` գյումրեցիները շտապում են միայն մթերային խանութներ ու դեղատներ: Մյուս օրերի համեմատ քիչ են նաև աշխատանքի գնացողները։ Ամենաաշխույժ ճեմափողոցի` Ռիժկովի սպասարկման օբյեկտներն ու խանութները փակ են: Չկան փողոցներում մշտապես հավաքվող տղամարդիկ, իսկ նրանց տեսնելուն պես ոստիկանները մոտենում ու խորհուրդ են տալիս տուն գնալ:
«Ես նման բան երբեք չէի տեսել ու չէի պատկերացնում, որ նմանատիպ հետևողականություն կլինի Գյումրիում: Հատուկենտ մարդկանց եմ հանդիպել, բոլորն էլ դիմակներով, ձեռնոցներով ու լրացված ձևաթղթով: Մեղք չեմ ուզում գործել ու ասել՝ ոստիկաններն անգործ էին. ինձ 4 անգամ կանգնեցրին, փաստաթղթերս ստուգեցին, խորհուրդներ տվեցին, ճամփեցին, հիացած եմ նաև ճանապարհային ոստիկանների աշխատանքով»,- Sputnik Արմենիայի հետ զրույցում ասաց տեսագրող–օպերատոր Տիգրան Գասաբյանը, որն այս լուսանկարների հեղինակն է:
Ի դեպ, քաղաքում էականորեն նվազել է նաև մեքենաների շարժը: Գյումրեցիներն ասում են. «Քաղաքս տեմպից ընկել է, հոգ չէ, կարևորը մարդու բան չեղնի»:
Արտակարգ դրությունը Հայաստանում կտևի մինչև ապրիլի 14–ը, իսկ քաղաքացիների տեղաշարժման սահմանափակումը կգործի մարտի 31-ը ներառյալ։
Օրվա կադր. «երկրի հերթապահ» ոստիկանը դուրս է եկել կորոնավիրուսի դեմ պայքարի առաջնագիծ
