ԵՐԵՎԱՆ, 6 հունիսի – Sputnik. Հայաստանի ու Ադրբեջանի արտգործնախարարների` Զոհրաբ Մնացականյանի ու Էլմար Մամեդյարովի հանդիպման վայրն ու ժամը շուտով կհրապարակվի։ Այսօր լրագրողների հետ զրույցում ասաց այս մասին ՀՀ արտգործնախարարը։
«Կա համաձայնություն, որ մենք նախանշված օրը և ժամին կանենք այդ հայտարարությունը: Կարող եմ ասել, որ մոտենում է այն օր, որ այդ հայտարարությունը արվի», – ասաց Մնացականյանը։
Նախարարը նշեց, որ նախընտրում է հարգել բոլոր կողմերին` բանակցող մյուս կողմին ու համանախագահներին, և պայմանավորվածությանը հավատարիմ մնալ:
Մնացականյանն ավելացրեց, որ այս պահին Նիկոլ Փաշինյանի ու Իլհամ Ալիևի հանդիպման մասին խոսք չկա։
Նշենք, որ Մնացականյան–Մամեդյարով վերջին հանդիպումը կայացել է մայիսի 13-ին Բրյուսելում Արևելյան գործընկերության 10-ամյակին նվիրված նախարարական հանդիպման շրջանակում։