ԵՐԵՎԱՆ, 24 սեպտեմբերի — Sputnik. Պաշտոնանկությունից հետո ԱԱԾ նախկին տնօրենի հայտարությունները ոչ միայն սպային, այլև շարքայինին պատիվ չեն կարող բերել։ Այս մասին այսօր լրագրողների հետ զրույցում ասաց ՀՀ փոխվարչապետ Տիգրան Ավինյանը։
«Նման ձևով հեռացումն ուղղակիորեն ինձ համար անհասկանալի է և անընդունելի։ Վանեցյանի հայտարարության մեջ մտահոգության տարրեր չեմ տեսնում, իմ տպավորությունն այլ է։ Ցավով եմ հետևում նրա հայտարարությունների շարքին»,–ասաց նա։
Երեկ` ի պատասխան Նիկոլ Փաշինյանի Լոս Անջելեսում արված հայտարարությանը, թե Վանցյանն իր քայլով սպայի ուսադիրները գցում է աղբարկղը, ԱԱԾ նախկին տնօրենը հարցազրույց էր տվել` ասելով, որ չնայած իր հրաժարականից հետո Փաշինյանը դեռ շարունակում է մարդիկ ուղարկել իր մոտ, խնդրանքով` որոշ ժամանակ լռի, բայց Վանեցյանը տեսնում է, որ Փաշինյանը խախտում է պայմանավորվածությունները և հանդես գալիս պոպուլիստական հայտարարություններով։
Անդրադառնալով այս հայտարարությանը` Ավինյանն արձագանքեց, ասելով, որ անձամբ ճանաչելով վարչապետին կարող է նշել, որ նա երբեք նմանատիպ մեթոդներով չի առաջնորդվել։ Ավինյանի խոսքով` Փաշինյանը չի կարող մարդ ուղարկել մեկի մոտ` նրան լռեցնելու։
Sputnik Արմենիայի հարցին, թե ի՞նչ նկատի ուներ Վանեցյանը, երբ ասում էր, որ իր հրաժարականը թող «կանգ առ»-ի սթափեցնող կոչ լինի իշխանությանը` Ավինյանը պատասխանեց, թե քանի որ Վանեցյանն իր հայտարարության հաջորդ օրն այնքան էլ լավ չէր հիշում, թե ինչ էր գրված եղել տեքստում, ուստի չի մեկնաբանի այն։
Դժգոհ էր և գեներալի ուսադիրներ էր տալի՞ս. փորձագետները` ուժայինների հրաժարականների մասին
Մեր հաջորդ հարցին, թե Վանեցյանի պաշտոնավարման ժամանակ միջանձնային կամ աշխատանքային լուրջ խնդիրներ եղե՞լ են` Ավինյանը պատասխանեց, որ աշխատանքային պրոցեսներում տարատեսակ հարցերով լինում են տարաձայնություններ, կոշտ քննարկումներ։ «Սակայն, անկախ այդպիսի քննարկումներից և տարաձայնություններից, կարծում եմ` բարձրաստիճան պաշտոնյան չպետք է նման ձևով հեռանա»,–ասաց նա։
Մեր վերջին նկատառմանը, թե Վանեցյանը, այնուամենայնիվ, թիմի անդամ է եղել, արդյո՞ք նրա պաշտոնանկությունից հետո նրա հետ հանդիպում կամ քննարկում չի եղել, որպեսզի «անհասկանալի հայտարարության» պատճառն իմանան` Ավինյանը պատասխանեց, որ այդ թեման արդեն սպառված է և այդ թեմայով այլևս չի խոսի։
Հիշեցնենք՝ սեպտեմբերի 16-ին, Վանաձորում կայացած ասուլիսի ժամանակ ՀՀ վարչապետ Նիկոլ Փաշինյանը հայտարարել էր, որ ստորագրել է Ազգային անվտանգության ծառայության տնօրեն Արթուր Վանեցյանի` աշխատանքից ազատման միջնորդագիրը։
Հայտարարությունից րոպեներ անց ՀՀ նախագահի պաշտոնական կայքում հրապարակվեց նաև Վանեցյանին ԱԱԾ տնօրենի պաշտոնից ազատելու մասին՝ ՀՀ նախագահ Արմեն Սարգսյանի հրամանագիրը։
Ավելի ուշ Արթուր Վանեցյանը հայտարարություն տարածեց իր հրաժարականի պատճառների մասին, որտեղ , մասնավորապես, հայտնում էր, որ հրաժարականի դիմում ներկայացնելու որոշումը ստեղծված իրավիճակում և գալիքի համատեքստում համարում է Հայաստանի Հանրապետությանն ու ժողովրդին ծառայելու ամենանախընտրելի և ամենահիմնավորված տարբերակը։
«Այս որոշումը ես կայացրել եմ նույնքան վստահ, որքան այն մեկը, երբ մեր երկրի համար բախտորոշ փուլում համաձայնվեցի ստանձնել Ազգային անվտանգության ծառայության տնօրենի պաշտոնը։ Մեկուկես տարվա իմ գործունեությունը միշտ բոլորիդ աչքի առջև է եղել, և ամեն քայլ արել եմ մեկ սկզբունքով` Հայրենիքն ու սպայի պատիվը վեր են ամեն ինչից»,–գրել էր Վանեցյանը:
Էմոցիոնալ ազգ, կամ Վանեցյանի երկրպագու դարձածները երեկ նրա մեջ հակառակորդ էին տեսնում
Արձագանքելով աշխատանքից ազատված Վանեցյանի հայտարարությանը, վարչապետի մամուլի քարտուղար Վլադիմիր Կարապետյանն ասել էր, թե նախ պետք է պարզել` ով է գրել այդ տեքստը: «Հույս ունենք՝ դրա հեղինակը քրեական պատասխանատվությունից «թյուրիմացաբար» խուսափած կոռուպցիոներների PR գրասենյակները չեն»,– ասել էր նա` Վանեցյանին հորդորելով չկորցնել սպայի արժանապատվությունը։
