ԵՐԵՎԱՆ, 15 նոյեմբեր – Sputnik. Հանրային խորհրդի նախկին նախագահ Վազգեն Մանուկյանը վերադառնում է քաղաքականություն։ Այս մասին նա այսօր` նոյեմբերի 15–ին հայտարարեց լրագրողների հետ հանդիպման ժամանակ։
«Արման Բաբաջանյանը գործիք է քաղաքական հարցեր լուծելու համար». Վազգեն Մանուկյան
«Ես նաև ԱԺՄ կուսակցության նախագահն եմ։ Ես անպայման ԱԺՄ–ն նորից վերականգնելու եմ և երևի գարնան ամիսներին մենք նորացված կուսակցության համագումար կանենք, և դա կնշանակի, որ արդեն մտել եմ քաղաքական դաշտ»,– ասաց Մանուկյանը։
Մինչ այդ Վազգեն Մանուկյանն արդեն հիմնադրել է «Վերնատուն» հասարակական–քաղաքական ակումբը, որի առաջին հանրային քննարկումը քաղաքական հարցերի շուրջ տեղի է ունեցել այսօր, Երևանում, ՄՀՀ կլոր դահլիճում։
Լրագրողների հարցին, թե ով կամ ովքեր են ֆինանսավորում ակումբը, Վազգեն Մանուկյանը պատասխանեց, որ «շատ մասնակիցներ կան, որ իրենց սեփական միջոցներով օգնում են»։ Ոչ մի գրասենյակ չի օգնում, միայն անհատական է»։
Մեր երկրում ձևավորվել է ատելության աննախադեպ մթնոլորտ. Վազգեն Մանուկյանը հրաժարական է տվել
Մանուկյանը հայտնեց, որ քննարկմանը մասնակցելու հրավերներ են ուղարկվել ԱԺ խմբակցություններին։
Նախկին իշխանությունների հետ հարաբերությունների մասին Մանուկյանը հայտնեց, որ պարբերաբար հանդիպում է բոլորի հետ, այդ թվում` ՀՀ երկրորդ նախագահ Ռոբերտ Քոչարյանի։
«Ռոբերտ Քոչարյանը, որ դուրս եկավ կարճ ժամանակով, մենք էլի հանդիպեցինք։ Ես հանդիպում եմ բոլորին։ Ես Նիկոլ Փաշինյանի հետ էլ կհանդիպեմ, եթե ինքը ցանկանա հանդիպել։ Բոլոր մարդկանց մեջ կա և՛ սպիտակը, և՛ սևը։ Բոլոր այդ մարդիկ արել են հերոսություններ և բազմաթիվ սխալներ»,– ասաց նա։
Նշենք, որ «Վերնատուն» հասարակական–քաղաքական ակումբի այսօր կայացած առաջին հավաքին մասնակցել են Դավիթ Շահնազարյանը (քաղաքական գործիչ, ԱԱԾ նախկին տնօրեն), Վիկտոր Սողոմոնյանը (Ռոբերտ Քոչարյանի գրասենյակի ղեկավար), Անդրանիկ Թևանյանը (քաղաքագետ), Ռուբեն Մելիքյանը (Արցախի նախկին ՄԻՊ), Թաթուլ Մանասերյանը (տնտեսագետ), Խոսրով Հարությունյանը (նախկին պատգամավոր), Ռուբեն Հակոբյանը (նախկին պատգամավոր), Երվանդ Բոզոյանը (քաղաքագետ), Լարիսա Ալավերդյանը (ՀՀ նախկին ՄԻՊ, «Ընդդեմ իրավական կամայականության» ՀԿ ղեկավար), Կարեն Բեքարյանը (նախկին պատգամավոր), Արփինե Հովհաննիսյանը (նախկին պատգամավոր, ԱԺ նախկին փոխնախագահ), Վարդան Բոստանջյանը (նախկին պատգամավոր) և այլք։
Ասֆալտին փռելով չէ. ըստ Վազգեն Մանուկյանի` Հայաստանում բռնապետություն է ձևավորվել
Հիշեցնենք` նոյեմբերի 13-ին Վազգեն Մանուկյանը հրաժարականի դիմում էր ներկայացրել Հանրային խորհրդի նախագահի պաշտոնից, ինչի մասին հայտնել էր ՀԽ անդամներին ուղղված իր հրաժեշտի նամակում։
