Տիգրան Քեյանի կարծիքով՝ ID քարտի պահանջը մարդկանց լուրջ խնդիրների առջև է կանգնեցնելու: Գործընթացն ավելի կդժվարանա տեխնիկական դժվարությունների պատճառով: Դա կբերի նրան, որ օտարերկրյա քաղաքացիները Հայաստանում այլևս ձեռքբերումներ չեն ունենա:
«Այս որոշմամբ լուրջ խնդիրներ են հարուցվելու բազմաթիվ քաղաքացիների, այդ թվում նրանց առջև, ովքեր զբաղվում են մեքենաների ներկրման և օտարման հարցերով: Նրանք այլևս չեն կարողանա իրականացնել նման գործարքներ»,- նշել է Տիգրան Քեյանը:
Որպեսզի հոկտեմբերի 6-ից հետո բողոքներ չլինեն, ՀԿ-ն, համագործակցելով ԱԺ «Իմ քայլը» խմբակցության պատգամավոր Սիսակ Գաբրիելյանի հետ, դիմել է կառավարությանը և խնդրել, որպեսզի նախագծի մեջ որոշակի ժամկետով հետաձգվի գոնե ID քարտի կամ հանրային ծառայության համարանիշի պահանջը:
Քեյանի համոզմամբ՝ այս ամենի հետ կապված առաջին գլոբալ խնդիրը գույքահարկի հավաքագրման անհնարինությունն է, քանի որ վերջին երկու տարիներին Հայաստանում մեծ քանակությամբ մեքենաներ են գնել արտասահմանցիները, ովքեր մեքենան գրանցելով ՀՀ-ում, տեղափոխվել են իրենց երկիր և գույքահարկ էլ չեն վճարում, ինչի գանձումը դառնում է անհնար: Համայնքներն ունեն բյուջետային պլանավորում մուտքերի մասով, սակայն չեն կարողանում այդ մուտքերն ապահովել:
«Վարորդի ընկեր» ՀԿ նախագահի կարծիքով՝ որքան էլ երկրների միջև ընթացակարգերը պարզվեն, միևնույն է, խնդիրը չի լուծվի, քանի որ գույքահարկի մասին օրենքից բխող պարտավորության համաձայն՝ չենք կարողանա այնպես անել, որպեսզի մարդիկ վճարեն: Օրինակ՝ չեն կարող Ղազախստանում իրականացնել գումարի գանձում:
