ԵՐԵՎԱՆ, 21 հուլիսի — Sputnik, Լաուրա Սարգսյան. «Կասպերսկու լաբորատորիայի» գլխավոր տնօրեն Եվգենի Կասպերսկին և ՀՌՀ ռեկտոր Արմեն Դարբինյանը համագործակցության հուշագիր են ստորագրել, որի շրջանակներում նախատեսված է 2016 թվականի սեպտեմբերի 1-ին մագիստրատուրայի նոր ծրագիր բացել։
«Հայաստանը ԱՊՀ երկրներից առաջինն է, որտեղ նման ուղղություն է բացվում, և այս ամենը նրա շնորհիվ, որ դուք այդքան խելացի և ակտիվ եք», — Sputnik Արմենիայի թղթակցի հետ զրույցում ասաց Կասպերսկին։
Նրա խոսքով` Հայաստանը մեծ ներուժ ունի այս ուղղությամբ իր տեղը գրավելու համար միջազգային ասպարեզում, այստեղ շատ ուժեղ է մաթեմատիկական դպրոցը։
«Անցյալ անգամ այստեղից մեկնեցի մի շարք գաղափարներով, որոնք մենք այժմ մշակում և իրականացնում ենք մեր լաբորատորիայում», — նշեց Կասպերսկին։
Նա կարծում է, որ Հայաստանում կրթությունն ավանդաբար շատ լավն է, և իրենց լաբորատորիան շահագրգռված է հայկական բուհերի հետ համագործակցությամբ։
ՀՌՀ ռեկտոր Արմեն Դարբինյանն իր հերթին ասաց, որ ապագայում հավանաբար բուհում այս ուղղությամբ կրթության տարբեր ձևեր կմշակվեն։
«Ցանկացողների համար երեք կամ վեց ամսով կարող են հատուկ ծրագրեր մշակվել (կիբերանվտանգության գծով)», — ասաց նա։
ՀՌՀ մագիստրական ծրագիրը բաղկացած կլինի երկու փուլից. չորս առարկա կկարդան Սլավոնական համալսարանում «Կասպերսկի Լաբորատորիայի» ներկայացուցիչները, իսկ մագիստրատուրայի առաջին կուրսի ավարտից հետո հաջորդ փուլը կլինի լաբորատորիայում ստաժավորում անցնելը։
Ինքը` Կասպերսկին, ասաց, որ իր լաբորատորիաներն ամեն օր 300 հազար նոր բացառիկ վիրուսներ են հայտնաբերում, և դրանց տեղայնացման և վնասազերծման համար նոր մասնագետներ, «թարմ» ուղեղներ և ուժ է անհրաժեշտ։
«Աշխարհը թվային է դարձել, և դա սարսափելի է, և որպեսզի այն ավելի լավը դարձնենք, անհրաժեշտ է շատ աշխատել։ Մենք կանենք ամեն ինչ, որպեսզի Հայաստանում կիբերանվտանգության գծով ավելի շատ որակյալ մասնագետներ լինեն», — հայտնել է Կասպերսկին։
Նրա կանխատեսումների համաձայն` շուտով աշխարհն այնքան թափանցիկ կլինի, որ տեղեկատվությունը պահպանել կարողանալու համար անհրաժեշտ կլինի անցնել թանկարժեք քվանտային համակարգիչների, որոնք քաղաքացիների մեծամասնության համար ֆինանսական տեսանկյունից հասանելի չեն լինի։
Բուհի գիտխորհրդի որոշմամբ` Կասպերսկուն ՀՌՀ պատվավոր դոկտորի կոչում է շնորհվել։
