ԵՐԵՎԱՆ, 28 հուլիսի — Sputnik. Ցուցարարները նախընտրեցին դադարեցնել հանրահավաքը` պայքարը շարունակելու վճռականությամբ։
Ցուցարաները վանկարկեցին «Ազատ, անկախ Հայաստան» ու ցրվեցին։
Հայտարարվեց, որ վաղը` հուլիսի 29-ին, 19։00-ից-19։30-ի սահմանում կրկին ցույց կանցկացնեն` ի աջակցություն «Սասնա ծռերի»։
Հիշեցնենք, որ հուլիսի 17-ին «Սասնա ծռեր» խմբի զինված անդամները մուտք են գործել ՀՀ ոստիկանության պարեկապահակային ծառայության գնդի տարածք, և արդեն 12 օր է՝ գտնվում են այնտեղ։ Հուլիսի 26-ի լույս 27-ի գիշերը «Սասնա ծռեր» խմբի անդամները պատանդ են վերցրել Ոստիկանության պարեկապահակային գնդի տարածք ահազանգով մեկնած շտապօգնության բրիգադի անդամներին։
Նշենք, որ այսօր՝ հուլիսի 28-ին, տեղի է ունեցել Հայաստանի Հանրապետական կուսակցության Գերագույն մարմնի նիստը, որից հետո լրագրողների հետ զրուցել է ՀՀ ԱԺ փոխնախագահ Հերմինե Նաղդալյանը։
Նաղդալյանը նշել է, որ երկրում ստեղծված իրավիճակը պետք է խաղաղ հանգուցալուծում ունենա, որի համար իշխանություններն անում են ամեն ինչ:
«Խնդիրները, որոնց մասին այս օրերին խոսվում են, տարիների ընթացքում կուտակված խնդիրներ են և այժմ բարեփոխումներ են ընթանում, դրանց ուղղությամբ ՀՀԿ-ն աշխատել է, աշխատում է և շարունակելու է աշխատել: Սակայն այսօր դրանք բոլորը ստվերում են մեկ և գլխավոր հարցով՝ իրավիճակը պետք է հանգուցալուծվի առանց արյունահեղության: Բոլորիս համար, պետականության համար շատ կարևոր է, որպեսզի մենք կարողանանք այս ամենից ճիշտ դասեր քաղենք: Համարում եմ, որ մեր երկրում ոչ ոք իրավունք չունի զենք վերցնել և կրակել դիմացինի վրա: Հայաստանում որևէ մեկը իրավունք չունի զենքով որևէ հարցի լուծման գնալ»,- ասել է նա:
