ԵՐԵՎԱՆ, 29 հոկտեմբերի — Sputnik, Լիլիթ Հարությունյան. Հայ դիզայներների աշխատանքներն այսուհետև հասանելի կլինեն ռուս գնորդների համար:
Ռուսաստանի Zian առևտրա-ցուցահանդեսային ցուցասրահում իրենց ապրանքանիշները ներկայացրին շուրջ տասնյակ դիզայներ Հայաստանից։ Նրանց թվում էին նաև Միկա Դանիելյանը (Harmony), Գայանե Կարապետյանը (Gart), Լիլիթ Մարգարյանը` El Fashion Avenue ապրանքանիշով, Տաթևիկ Մանուկյանը (Mavita)։ Այս ցուցասրահում ներկայացվեց նաև հանրահայտ երգչուհի Սիրուշոյի Pregomesh հավաքածուն:
Sputnik Արմենիայի թղթակցի հետ զրույցում Zian-ի գործադիր տնօրեն, Մոսկվայում հայ դիզայներների հավաքածուների ամենամյա ցուցադրության` Armfashionday-ի կազմակերպիչ Նաիրա Նիազյանը պատմեց, որ ցուցասրահն այս կամ այն ապրանքանիշը խթանելու ամենաարդյունավետ միջոցներից է:
«Եթե մինչև հիմա առանձին միջոցառումներ էին անցկացվում, որոնցից մեկն էլ Armfashionday-ն էր, ապա այժմ 600 քմ մշտական մեծ հարթակ է գործում, որտեղ կարելի է ցուցադրել ապրանքանիշը, ցուցադրություններ անցկացնել և գնորդների հետ հանդիպումներ կազմակերպել: Սա Ռուսաստանում նորաձև ապրանքանիշները խթանելու լավագույն տարբերակն է», — նշեց Նաիրան:
Նրա խոսքով` Zian-ում մշտապես կկազմակերպվեն նորաձևության շոուներ, միջոցառումներ, շնորհանդեսներ` հաճախորդների և դիզայներների միջև հետագա համագործակցության համար կապ հաստատելու համար:
Դիզայներ Տաթևիկ Մանուկյանն էլ Sputnik Արմենիայի թղթակցի հետ զրույցում ասաց, որ հույս ունի Zian-ի շնորհիվ Ռուսաստանում ընդլայնել իր հաճախորդների բազան:
«Կարծում եմ` Mavita ապրանքանիշն ավելի ճանաչելի կդառնա հատկապես ռուս գնորդների համար: Բացի այդ, Մոսկվայի մեր հաճախորդներն արտադրանքին տեղում ծանոթանալու և լայն տեսականուց որևէ բան ընտրելու լավ հնարավորություն կունենան», — ասաց նա:
Zian ցուցասրահում ներկայացված են նաև Իտալիայի, Ֆրանսիայի, Լիբանանի, Ռուսաստանի և Բելառուսի դիզայներների աշխատանքները:
