ԵՐԵՎԱՆ, 24 հոկտեմբերի — Sputnik. Ամերիկահայ հեռուստաաստղ Քիմ Քարդաշյանը, որն օրերս նշեց իր 38-ամյակը, պատմել է` ինչպես է իմացել, որ խորթ հայրը` Բրյուս Ջենները, սեռական կողմնորոշման խնդիր ունի։ Մինչ կին դառնալը նա երկար ժամանակ թաքցրել է իր հակումները։ Քիմի խոսքով` մի անգամ ավտոտնակում նա խորթ հորը տեսել է կնոջ հագուստով։ Քարդաշյանն այս մասին պատմել է Ալեք Բոլդուինի հետ The Alec Baldwin Show շոուի ժամանակ։
«Կոմսոմոլսկայա պրավդան» հիշեցնում է, որ Բրյուս Ջենները 1976 թվականի Օլիմպիական խաղերի ոսկե մեդալակիր է։ 2015 թվականին նա առաջին անգամ հրապարակավ ասել է, որ սեռափոխություն է արել ու կին է դարձել։ Հիմա Բրյուսի անունը Քեյլթլին է։ Մինչ այդ նա երկար տարիներ ամուսնացած է եղել Քիմ Քարդաշյանի մոր` հաղորդավարուհի Քրիս Ջենների հետ։
Քիմը Ալեք Բոլդուինի հեռուստաշոուի ժամանակ ասել է, որ որևէ մեկը գաղափար չուներ խորթ հոր գաղտնի կյանքի մասին։
«Ես իմացել եմ, երբ 25 տարեկան էի։ Ես մորս տանն էի, մտա ավտոտնակ ու տեսա Բրյուսին, որը կնոջ պես էր հագնված», — ասել է Քիմ Քարդաշյանը։
Քիմը հիստերիայի մեջ է ընկել և առաջին ցանկությունը եղել է տնից փախչելը։
«Ես վազեցի ու քրոջս` Քորթնիին զանգեցի. «Պետք է հանգստյան օրերը քեզ հետ անցկացնեմ»։ Ցնցումների մեջ էի, հիստերիկի պես լացում էր։ Քորթնին ասաց. «Ի՞նչ է, Բրյուսին դավաճանության պահին ես բռնացրե՞լ»։ Իսկ ես մտածեցի, որ չգիտեմ` ինչ անուն տալ նրան, ինչ տեսել էի», — հիշում է Քիմը։
Դրանից հետո Բրյուսը խոսել է խորթ դստեր հետ ու խնդրել է նրան երդվել, որ ոչ ոքի չի պատմի իր գաղտնիքի մասին։
Նա զանգեց ինձ ու ասաց. «Մի օր կնստեմ ու ամեն ինչ կբացատրեմ ձեզ, բայց մինչ այդ խնդրում եմ` ոչ ոքի մի ասա, մորդ էլ մի ասա, նա կսպանի ինձ», — անկեղծացել է Քիմ Քարդաշյանը։
«Մտածեցի, որ եթե ասեմ մորս, ապա կկործանեմ նրա ամուսնությունը, իսկ փոքր քույրերս առանց հոր կմնան։ Դրա համար ավելի լավ է` լռեմ», — ասել է Քիմը։
Նրա խոսքով` մայրը` Քրիսը, երկար ժամանակ չի իմացել ամուսնու հակումների մասին։ Նրանք ամուսնացել էին 1991 թվականին ու 2015-ին ամուսնալուծվեցին, միայն այն ժամանակ Բրյուսը վերջնականապես փոխեց սեռը։
«Մայրս այնքան սիրահարված էր։ Նա չէր մտածում, որ իրենց հարաբերություններում կարող է նման բան լինել։ Նա չէր ենթադրում, որ ամուսինը կարող է կին դառնալ», — ասել է Քարդաշյանը։
Քիմի խորթ հայրն ընկերուհի ունի, որի հետ պարբերաբար հայտնվում է այս կամ այն վայրում։
