ԵՐԵՎԱՆ, 26 սեպտեմբերի — Sputnik. Երևանի շենքերից մեկի 6-րդ հարկից ընկած 2.5 տարեկան Արվինն այսօր առողջացած դուրս գրվեց «Սուրբ Աստվածամայր» բժշկական կենտրոնից: Այս մասին Facebook սոցիալական ցանցի իր էջում գրել է բժշկական կենտրոնի մամուլի քարտուղար Գևորգ Դերձյանը։
«Նման «Happy end» ես տեսել էի միայն հեքիաթներում ու ֆիլմերում: Այս օրերի ընթացքում այնքան ջերմություն ենք ստացել, որ չեմ կարող նկարագրել, թե ինչ եմ զգում հիմա: Այս հիվանդանոցն իմ տունն է, աշխատակիցները՝ ընտանիքիս անդամները. շնորհակալ եմ յուրաքանչյուրին: Նրանք թույլ տվեցին, որ շարունակեմ ժպտալ, ապրել ու ուրախանալ այս պատմության «Happy end»-ով» - ասել է Արվինի մայրը՝ Մարզիա Վիքսոմը:
Դերձյանը հայտնում է, որ երեխան դեռ որոշ ժամանակ կշարունակի մնալ բժիշկների հսկողության տակ, իսկ հեռանալիս բոլորին ժպտում էր, անընդմեջ շնորհակալություն հայտնում: Նրա խոսքով` ԲԿ-ի միջանցքներում տոն էր, քանի որ տղային բոլորը հասցրել էին սիրել:
Վեցերորդ հարկից ընկած 2.5 տարեկան տղային վիրահատել են
Հիշեցնենք, որ սեպտեմբերի 5-ին, ժամը 10:32-ին Երևանի Թումանյան 32 հասցեում գտնվող շենքի 6-րդ հարկից 2.5 տարեկան տղա երեխա էր ընկել: Փոքրիկն անգիտակից վիճակով տեղափոխվել էր «Սուրբ Աստվածամայր» ԲԿ-ի վերակենդանացման բաժանմունք: Տղայի մոտ առկա է եղել զուգակցված վնասվածքներ, գանգի ոսկրերի ցիրկուլյար կոտրվածք, գլխուղեղի սալջարդ, ողերի կոտրվածքներ, կոնքի ոսկրերի կոտրվածքներ: Նրան միացված էր արհեստական շնչառության սարք և անգիտակից էր: Բժիշկները վիճակը գնահատել են ծայրահեղ ծանր: Սեպտեմբերի 9-ին տղան գիտակցության էր եկել և ճանաչել ծնողներին:
Երևանում 6–րդ հարկից ընկած 2.5 տարեկան տղան սկսել է ինքնուրույն շնչել
Ի դեպ, երեխայի հայրը` Արթին Վիքսոմը, իրանահայ է, կինը` իրանցի։ Տղայի հայրը պատմել էր, որ ԱՄՆ–ից սեպտեմբերի 4–ի գիշերը եկել էին Հայաստան` հանգստանալու։ Դեպքը տեղի է ունեցել ժամանման հաջորդ օրը։
Արթինը հաճելիորեն զարմացած էր թե՛ բժիշկների, թե՛ ծանոթ–անծանոթների արձագանքից։ Ասում էր, որ բոլորը շատ սրտացավորեն են վերաբերվել իրենց և անգամ մինչ այսօր անծանոթ մարդիկ զանգում, հարցնում են երեխայի առողջության մասին։
