ԵՐԵՎԱՆ, 3 հոկտեմբերի — Sputnik. Ազգային ժողովը կողմ քվեարկեց «Իմ քայլը» խմբակցության ներկայացրած` Սահմանադրական դատարանի նախագահ Հրայր Թովմասյանի լիազորությունները դադարեցնելու նախագծին։
Քվեարկությունն իրականացվեց փակ գաղտնի ընթացակարգով։ Ինչպես ձայների հաշվարկից հետո հայտարարեց ԱԺ հաշվիչ հանձնաժողովի նախագահ Վահագն Հովակիմյանը, նախագծի քննարկմանը մասնակցեցին 132 պատգամվորից 101–ը։ Նրանցից 98-ը կողմ քվեարկեցին նախագծին, 1–ը` դեմ։ 2 քվեաթերթիկ համարվեցին անվավեր։
Այսպիսով, Թովմասյանի լիազորությունները դադարեցնելու հարցն այժմ պետք է որոշեն Սահմանադրական դատարանի դատավորները։
Նշենք, որ մինչ քվեարկության մեկնարկը, ԱԺ նիստերի դահլիճում «Իմ քայլը» խմբակցության մի քանի պատգամավոր ՍԴ դատավորներին կոչ արեցին «չզբաղվել արկածախնդրությամբ» ու «ՍԴ դատավորի զավթած աթոռը վերադարձնել ժողովրդին»։
Մինչ Թովմասյանի լիազորությունները դադարեցնելու մասին նախագծի քննարկումը «Լուսավոր Հայաստանը» հայտարարել էր, որ «կողմ» է քվեարկելու նախագծին։ Իսկ «Բարգավաճ Հայաստան» խմբակցության ղեկավար Գագիկ Ծառուկյանը հոկտեմբերի 2-ին լրագրողներին հայտնել էր, որ ԲՀԿ–ն քվեարկությանը չի մասնակցելու։
«Թովմասյանն ինձ հետաքրքրել է այնքան, ինչքան թռչնագրիպը` Խորենացուն». Պետրոսյան
Հիշեցնենք, որ սեպտեմբերի 16–ին «Իմ քայլը» խմբակցության նիստում որոշում էր կայացվել Սահմանադրական դատարանի անդամներից մեկի` Հրայր Թովմասյանի նկատմամբ սկսել լիազորությունները դադարեցնելու գործընթաց։ «Իմ քայլը» խմբակցության հեղինակած նախագծին ԱԺ պետաիրավական հանձնաժողովը դրական եզրակացություն էր տվել։
Հրայր Թովմասյանը ՍԴ նախագահ էր ընտրվել 2018–ի փետրվարին։
«Թող իր վրա շատ չվերցնի Թովմասյանը». ԱԺ–ում քննարկումը թեժ մթնոլորտում է անցնում
