ԵՐԵՎԱՆ, 17 հոկտեմբերի – Sputnik. ՀՀ ԱԺ պատգամավոր Արման Բաբաջանյանը ՀՀ գլխավոր դատախազին հաղորդում է ներկայացրել առ այն, որ մի խումբ պաշտոնատար անձինք յուրացրել են իշխանությունը։ Այս մասին հայտնում է ՀՀ հատուկ քննչական ծառայությունը։
«Արման Բաբաջանյանը ՀՀ գլխավոր դատախազին հաղորդում է ներկայացրել մի խումբ պաշտոնատար անձանց կողմից պետական իշխանությունը յուրացնելու առերևույթ հանցագործության դեպքի կապակցությամբ», - նշված է քննչական ծառայության տարածած հողորդագրության մեջ:
Նշվում է, որ հաղորդման հիման վրա ՀՀ հատուկ քննչական ծառայությունում նախապատրաստված նյութերով որոշում է կայացվել ՀՀ քրեական օրենսգրքի 300-րդ հոդվածի 1-ին մասով (այն է` իշխանությունը զավթելը` բռնություն գործադրելու կամ բռնություն գործադրելու սպառնալիքի միջոցով, ինչպես նաև Սահմանադրությամբ չնախատեսված այլ եղանակով Հանրապետության Նախագահի, Ազգային ժողովի, կառավարության կամ սահմանադրական դատարանի լիազորություններին տիրանալը) քրեական գործ հարուցելու մասին:
Կատարվում է նախաքննություն:
Հրայր Թովմասյանի հարցով քննարկմանը միայն մեկ դեմ է եղել. «Հրապարակ»
Նշենք, որ սեպտեմբերի 6-ին Արման Բաբաջանյանը հայտարարեց, որ հեռանում է «Լուսավոր Հայաստան» խմբակցությունից, սակայն հրաժարվեց վայր դնել մանդատը։ Նա այժմ խորհրդարանում ներկայացված է որպես անկախ պատգամավոր։
Հիշեցնենք` Բաբաջանյանը պնդում է, որ ՍԴ նախագահ Հրայր Թովմասյանը պաշտոնը յուրացրել է հանցավոր սխեմաներ կիրառելով, և հոկտեմբերի սկզբին դիմում է ներկայացրել Գլխավոր դատախազություն՝ պահանջելով քրեաիրավական գնահատական տալ այդ «կոպտագույն իրավախախտումներին»:
Հոկտեմբերի 14-ին ՍԴ-ն մերժեց «Ազգային ժողովի դիմումի հիման վրա՝ Սահմանադրական դատարանի դատավոր Հրայր Թովմասյանի լիազորությունները դադարեցնելու վերաբերյալ» գործի քննությունը։
Հոկտեմբերի 3-ին ԱԺ–ն ընդունել էր «Իմ քայլը» խմբակցության նախագիծը` Սահմանադրական դատարանի անդամ Հրայր Թովմասյանի լիազորությունները դադարեցնելու հարցով ՍԴ դիմում ներկայացնելու մասին։