ԵՐԵՎԱՆ, 27 հոկտեմբերի — Sputnik. Հայաստանի ներկա իշխանություններն առայժմ գնահատական չեն տվել «Հոկտեմբերի 27-ի» գործին։ Այդ մասին կիրակի օրը լրագրողների հետ զրույցում ասաց խորհրդարանի նախկին փոխխոսնակ Յուրի Բախշյանի կինը՝ Անահիտ Բախշյանը, խորհրդարանում տեղի ունեցած ահաբեկչության 20-ամյա տարելիցին նվիրված միջոցառման ժամանակ։
Ինչպես նշեց Բախշյանը, առայժմ չի երևում, որ նոր իշխանությունները փորձում են արդարության հասնել այս հարցում։ Նրանք կտրուկ արտահայտություններ չեն անում կատարողների, իսկ գլխավորը՝ այդ հանցագործության կազմակերպիչների հասցեին։
Նրա խոսքով՝ ահաբեկչական խմբի ղեկավար Նաիրի Հունանյանն ակնարկում է, որ նոր իշխանության օրոք կարող է ինչ-որ բան պատմել, բայց նրան չարժե հավատալ։
«Նա խոսի չխոսի, պետք է մինչև կյանքի վերջը նստի». Ստեփան Դեմիրճյանը` Նաիրի Հունանյանի մասին
«Ես բացարձակապես չեմ վստահում այդ տականքի ոչ մի խոսքին։ Չի կարելի նույնիսկ մտածել այն մասին, որ պետք է բավարարել ազատ արձակման դիմումը», - հայտարարեց Բախշյանը։
Հիշեցնենք, որ 1999թ.-ի հոկտեմբերի 27-ին հանցախումբը` Նաիրի Հունանյանի գլխավորությամբ, ՀՀ ազգային ժողովի նիստերի դահլիճում սպանել էր ԱԺ խոսնակ Կարեն Դեմիրճյանին, վարչապետ Վազգեն Սարգսյանին, փոխխոսնակներ Յուրի Բախշյանին և Ռուբեն Միրոյանին, օպերատիվ հարցերով նախարար Լեոնարդ Պետրոսյանին, պատգամավոր Արմենակ Արմենակյանին, Հենրիխ Աբրահամյանին և Միքայել Քոթանյանին:
Հարուցված քրեական գործի նախաքննությունը տևեց 1.5 տարի, դատավարությունը` 2.5։
2003թ–ին ավարտված դատավարության արդյունքում դատարանը որոշեց Նաիրի Հունանյանին, նրա եղբորը` Կարեն Հունանյանին, նրանց քեռուն` Վռամ Գալստյանին, ինչպես նաև Դերենիկ Բեջանյանին, Էդիկ Գրիգորյանին, Նորայր Եղիազարյանին ու Աշոտ Կնյազյանին դատապարտել ցմահ, Համլետ Ստեփանյանին` 14 տարվա ազատազրկման։
Հանցագործությանը հաջորդած 20 տարվա ընթացքում խմբի 8 անդամներից 4-ը մահացան տարբեր հանգամանքներում։
«20 տարի անց էլ լռե՞նք. Ջհանգիրյանն ու Տեր- Պետրոսյանը պետք է խոսեն». Միքայելյան
