ԵՐԵՎԱՆ, 11 դեկտեմբերի — Sputnik. Դեկտեմբերի 31-ին Հանրապետության հրապարակում Գորան Բրեգովիչի համերգը կազմակերպած Factory ընկերությունը աշխարհահռչակ երաժշտին ու նրա խմբին պարտավորվել է վճարել 65 000 եվրո։ Այս մասին այսօր լրագրողների հետ հանդիպմանը հայտնեց Երևանի փոխքաղաքապետ Տիգրան Վիրաբյանը։
«Խումբը լինելու է 10-ից ավելի արտիստներով, կենդանի նվագակցությամբ։ Հայաստան են ժամանում նույնիսկ բեք վոկալ կատարող արտիստները, այսինքն` ամբողջական խմբով»,– ասաց նա։
Հաշվի առնելով արտիստների միջազգային պահանջարկը և համերգի կազմակերպման ժամանակահատվածն ու այն, որ այդ գումարը բաշխվելու է խմբի բոլոր անդամների միջև` Վիրաբյանը կարծում է, որ գումարը մեծ չէ։ Հատկապես, որ միջազգային մակարդակի նման արտիստը համաձայնել է գալ Հայաստան ու Ամանորն անցկացնել այստեղ և իր համար ավելի տաք երկիր չի ընտրել։
Բացառիկ Ամանոր է լինելու. Փաշինյանը խորհուրդ է տալիս Նոր տարին անցկացնել Երևանում
«Եթե դուք ուսումնասիրեք նման արտիստների հոնորարների չափերը, նաև ուսումնասիրեք մեր հայ արտիստների հոնորարների չափը որքան է բարձրանում Ամանորի գիշերը ու համադրեք, որ մի ամբողջ նվագախումբ է ելույթ ունենալու, ձեզ համար պարզ կլինի, որ նշված գումարն այնքան էլ ահասարսուռ չէ, որքան փորձ է արվում վերջին օրերին ներկայացնել»,– ասաց Վիրաբյանը։
Հիշեցնենք` մինչ այդ նախատեսված էր, որ Բրեգովիչի համերգը կկայանա նոյեմբերի 24-ին Կարեն Դեմիրճյանի անվան մարզահամերգային համալիրում։
«Սա ոչ այնքան ծախս է, որքան ներդրում». Մարությանի խոսնակը մեկնաբանել է ամանորյա ծախսերը
Համերգից շուրջ 10 օր առաջ, սակայն, հայտարարվեց, որ այն չեղարկվել է։ Ավելի ուշ հայտնի դարձավ, որ համաշխարհային ճանաչում ունեցող արտիստը անվճար համերգով հանդես կգա Երևանի Հանրապետության հրապարակում Ամանորի գիշերը։
