ԵՐԵՎԱՆ, 12 դեկտեմբերի – Sputnik. Երեկ երեկոյան «Քաղաքացիական պայմանագիր» կուսակցության կենտրոնական գրասենյակում տեղի է ունեցել ԱԺ «Իմ քայլը» խմբակցության նիստը, որը տևել է մոտ երեք ժամ։ Այս մասին գրում է «Ժողովուրդ» օրաթերթը։
Աղբյուրի տեղեկություններով` նիստին շատ պատգամավորներ չեն մասնակցել, ներկաներից էլ ոչ բոլորն են մինչև վերջ մնացել։
Հավաքի գլխավոր թեման եղել է այսօր` դեկտեմբերի 12-ին, մեկնարկող ԱԺ արտահերթ նիստը, և պատգամավորները քննարկել են օրակարգային հիմնական հարցերն ու հստակեցրել քվեարկության հետ կապված դիրքորոշումները:
«Անդրադարձ է եղել նաև ՍԴ դատավորներին վերաբերող նախագծի երեկվա քվեարկության թեմային»,-հայտնում է թերթը:
Նշենք, որ Ազգային ժողովը երեկ երկրորդ ընթերցմամբ ու ամբողջությամբ ընդունեց ՍԴ դատավորներին վաղ կենսաթոշակի ուղարկելու մասին օրինագիծը։ Նախագծին կողմ քվեարկեցին 82 պատգամավոր, դեմ` 34։ ԱԺ փոխխոսնակ Ալեն Սիմոնյանը, խոսելով այդ մասին, ասել էր, որ իշխանությունը «ձեռք է մեկնել» ՍԴ անդամներին։
Դատարանների նկատմամբ վստահության պակասի մեղավորը քաղաքական իշխանությունն է. ՍԴ դատավոր
Հիշեցնենք` ՀՀ կառավարությունը դեկտեմբերի 5-ի նիստում հաստատեց ԱԺ արտահերթ գումարելու որոշումը։ Բանն այն է, որ Ազգային ժողովը մինչև տարեվերջ պետք է հասցնի վավերացնել 152 մլն դոլարի վարկային համաձայնագրերը, այլապես 2019թ–ի բյուջեի կատարողականը վտանգված է։
Վարկային համաձայնագրերից բացի արտահերթ նիստի օրակարգում շուրջ տասնյակ այլ հարցեր էլ կան։
