ԵՐԵՎԱՆ, 18 դեկտեմբերի — Sputnik. Գյումրիում աղբանոցի մոտ մահացած հայտնաբերված 1 տարեկան երեխայի մայրը կալանավորվել է. նրան մեղադրանք է առաջադրվել սպանության հատկանիշներով։ Այս մասին հայտնում է ՀՀ քննչական կոմիտեն։
Հայտնել էինք, որ 2019–ի օգոստոսի 31–ին Գյումրիի Բուլվարային թաղամասի աղբանոցում մոտ 1 տարեկան աղջիկ երեխայի դի էր հայտնաբերվել։
«Պարզվել է, որ 2019–ի օգոստոսի 30-ին` ժամը 22:00-24:00-ն ընկած ժամանակահատվածում, 20-ամյա Գյումրիի բնակչուհին կպչուն ժապավենով կապել է իր՝ 2018-ի սեպտեմբերին ծնված դստեր ձեռքերն ու ոտքերը, բերանին փաթաթել կիսաշրջազգեստ։ Հետո երեխային տեղափոխել և դրել է փողոցում տեղակայված աղբարկղերից մեկի մեջ»,–նշված է հաղորդագրության մեջ:
Նախաքննության ընթացքում նշանակված դիակի դատաբժշկական փորձաքննության եզրակացության համաձայն՝ մանկահասակ երեխան մահացել է մեխանիկական շնչահեղձությունից՝ սննդային զանգվածով շնչառական ուղիների փակման հետևանքով:
«Նա չէր սպանի». գյումրեցի տղամարդը` 1 տարեկան դստեր սպանության մեջ մեղադրվող հարսի մասին
Նախաքննության ընթացքում ձեռնարկված քննչական գործողությունների արդյունքում ձեռք բերված բավարար ապացույցների համակցությամբ՝ երիտասարդ կնոջը մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով` սպանության հատկանիշներով:
Գյումրիում մեկ տարեկան երեխային սպանած մայրը կալանավորվեց
Դեպքի նախաքննությունն ավարտվել է։ Քրեական գործը ՝ մեղադրական եզրակացությունը հաստատելու և դատարան ուղարկելու միջնորդությամբ, ուղարկվել է նախաքննության օրինականության նկատմամբ հսկողություն իրականացնող դատախազին:
Հիշեցնենք, որ ավելի վաղ հայտնել էինք, որ երեխայի մայրն ամուսնալուծված է, ապրում է Գյումրու Մուշ թաղամասում:
