ԵՐԵՎԱՆ, 22 փետրվարի — Sputnik. Իրանում կորոնավիրուսով վարակվելու ևս 10 նոր դեպք է գրանցվել։ Այսպիսով մի քանի օրվա ընթացքում վարակի ընդհանուր դեպքերի թիվն այդ երկրում հասել է 28-ի։ Ինչպես հայտնում է ՌԻԱ Նովոստին` Իրանի առողջապահության նախարարությանը հղում անելով`10 նոր դեպքերը գրանցվել են վերջին 1 օրվա ընթացքում։
«Վարակվածներից 8-ը Կում քաղաքում են, 2-ը` Թեհրանում։ Այսպիսով վարակվածների թիվն առ այսօր հասել է 28-ի։ Ցավոք, մինչ օրս մահացել է 5 մարդ»,– ասված է հաղորդագրության մեջ։
Ի դեպ, անվտանգության նկատառումներից ելնելով` այս տարի արգելվել են Իրանի տարածքից Իրաք ուխտագնացությունները։ Մահմեդականների սրբավայրեր տանող ժանապարհներն այս տարի փակ կլինեն Իրանի քաղաքացիների համար։
Հիշեցնենք`Իրանում վարակի տարածման վերաբերյալ երեկ հայտարարությամբ էր հանդես եկել այդ երկրում ՀՀ դեսպանատունը։ Հաշվի առնելով վարակի հնարավոր տարածման վտանգը` դեսպանատունը հորդորել էր ԻԻՀ տարածքում գտնվող հայաստանցիներին կապ հաստատել ՀՀ դեսպանության հետ և տեղեկություն հայտնել իրենց գտնվելու վայրի վերաբերյալ:
Արսեն Թորոսյանն անդրադարձել է Իրանում գրանցված կորոնավիրուսի դեպքերին
ՀՀ առողջապահության նախարարությունը հայտարարել էր, որ ուժեղացվել են Իրանի հետ սահմանի Մեղրիի սահմանային անցակետով անցնող, ինչպես նաև Իրանից օդանավով Հայաստան ժամանող ուղևորների հսկողությունը: Կասկածելի բոլոր դեպքերում կատարվում է նաև հսկողություն Հայաստանի ամբողջ տարածքում:
ՀՀ–ում մինչ օրս կորոնավիրուսով վարակի դեպք չի գրանցվել:
Իսկ չինացի բժիշկներն այդ ընթացքում աշխարհին մեկ այլ ահազանգ են հնչեցրել. վարակը կարող է կրկնվել նաև արդեն հիվանդացած ու բուժված մարդկանց մոտ։
Չինաստանի Սուչան նահանգում գրանցվել է կորոնավիրուսով կրկնակի վարակվելու առաջին դեպքը։ Ինչպես հայտնում է Beijing News Express–ը, հիվանդ քաղաքացին հունվարի սկզբում դուրս էր գրվել հիվանդանոցից։ Դրանից հետո գտնվել է կարանտինի մեջ, տնից դուրս չի եկել։ Բայց դարձյալ հիվանդացել է նույն վարակով։
Կորոնավիրուսը հասել է Իրան. ինչպես վարակը կանդրադառնա Հայաստանում զբոսաշրջիկների հոսքի վրա
