ԵՐԵՎԱՆ, 23 ապրիլի - Sputnik. Հայաստանի արտաքին գործերի նախարար Զոհրաբ Մնացականյանը Twitter-ի իր էջում գրառում է արել հայտնի բարերար Ասո Թավիթյանի մահվան կապակցությամբ՝ նրան համարելով հայ ժողովրդի լեգենդ և բարոյական ուղենիշ:
«Ասո Թավիթյանը մի ամբողջ ինստիտուտ էր, կյանքի հանդեպ նրա սերը՝ լավատեսության աղբյուր։ Ես շատ եմ կարոտում նրան և հարգանքի տուրք եմ մատուցում նրա պայծառ հիշատակին», - գրել է Մնացականյանը։
I’m blessed with the generosity of his friendship. I miss him very much and celebrate his blessed memory. https://t.co/dIJhB4ICaH
— Zohrab Mnatsakanyan (@ZMnatsakanyan) April 22, 2020
Twitter-ում գրառում է արել նաև Հայաստանում ԱՄՆ նախկին դեսպան Ջոն Էվանսը․ «Եվս մեկ մեծ կորուստ այս շաբաթվա ընթացքում»։
Ասո Թավիթյանի մահվան մասին գրել է նաև Ամենայն հայոց կաթողիկոս Գարեգին Բ-ն։
«Խորը ցավով տեղեկացանք Մայր Աթոռ Սուրբ Էջմիածնի և հայ ազգի մեծ բարերար ու բարեգործ, մարդասեր և հայրենասեր, մեր սիրելի բարեկամ Ասո Թավիթյանի անակնկալ մահվան մասին։ Նրա վախճանը ծանր կորուստ է մեր Սուրբ Եկեղեցու և ողջ ազգի համար։ Հնարավոր չէ ամբողջությամբ թվարկել մեր սիրելի Ասոյի բոլոր հայրենանվեր գործերը։ Իր բազմակողմ գործունեության մեջ կարևոր տեղ էր գրավում Հայոց Եկեղեցին, որին զորակցելու միջոցով բարեհիշատակ տիար Թավիթյանը յուրօրինակ իր տուրքն էր մատուցում ազգային ինքնության և ոգու ամրապնդման ձեռնարկներին։ Նրա ազնիվ հանձնառությամբ և ամենայն նախանձախնդրությամբ Մայր Աթոռ Սուրբ Էջմիածնում սկսվեց իրականացվել «Հայոց Եկեղեցին 21-րդ դարում» ծրագիրը՝ նոր դարի իրողություններին ներդաշնակ կառավարվող Հայոց Եկեղեցի ունենալու տեսլականով։ Այդ կապակցությամբ բազում առիթներ ենք ունեցել վայելելու մեծանուն հայորդու ներկայությունը Սուրբ Էջմիածնում»,- Facebook-ում գրել է նա։
«Թավիթյան» հիմնադրամի միջոցով Հայաստանից շուրջ 350 երիտասարդներ իրենց բարձրագույն կրթությունն են շարունակել ԱՄՆ Թաֆթս համալսարանի Իրավունքի և դիվանագիտության Ֆլետչերի դպրոցում և այսօր ամենատարբեր ոլորտներում իրենց ծառայությունն են բերում ի պայծառություն մեր հայրենիքի։
2017 թվականին Ասո Թավիթյանը հայրենիք-սփյուռք կապերի ամրապնդման գործում ներդրած ավանդի համար պարգևատրվել էր Հայաստանի Հանրապետության պետական պարգևով՝ Պատվո շքանշանով, որը նրան էր հանձնել այն ժամանակ երկրի նախագահ Սերժ Սարգսյանը։
