ԵՐԵՎԱՆ, 29 ապրիլի - Sputnik. Կառավարության տնտեսական աջակցության ծրագրերից օգտվելու հայտերի 60 տոկոսը բավարարվել է։ Տեղեկությունը կառավարության մամուլի կենտրոնում հայտնեց ՀՀ էկոնոմիկայի նախարար Տիգրան Խաչատրյանը։
«Տնտեսական ծրագրերով աջակցություն ստանալու հայտերի 40 տոկոսը մերժվել է, քանի որ տնտեսվարողների գործունեության ոլորտը չի համարվել կորոնավիրուսի հետևանքով տուժած ոլորտ»,–ասաց նախարարը։
Նրա խոսքով` կորոնավիրուսի տնտեսական հետևանքները չեզոքացնող 1-ին միջոցառման շրջանակում աջակցություն են ստացել 284 բարվոք վարկային և հարկային պատմություն ունեցող կազմակերպություններ, որոնց համաֆինանսավորմամբ 24,6 միլիարդ դրամի վարկեր են տրամադրվել։
Երկրորդ միջոցառման շրջանակում շահառու անձանց և կազմակերպությունների թիվը գերազանցում է 6000-ը։ Նրանց համաֆինանսավորմամբ գյուղվարկեր են տրամադրվում։ Ընդ որում, շահառուներից 5500 այն անհատներն են կամ կազմակերպությունները, որոնք դիմել են մինչև 1 միլիոն դրամի վարկավորման համար։
Խաչատրյանը հայտնեց նաև, որ երրորդ ծրագրի շրջանակում, որի միջոցով էլ ՓՄՁ–ներին է վարկեր տրամադրվում, աջակցություն են ստացել 549 կազմակերպություններ, որոնց տրամադրվել է 6.3 մլրդ դրամ արժեքով վարկային հայտեր։
Հինգերորդ միջոցառման շրջանակում արդեն իսկ 1.9 մլրդ դրամ է տրամադրվել մի շարք կազմակերպությունների։
Պետական բյուջեում փոփոխություն արվեց. կորոնավիրուսի վնասը գնահատվեց 300 միլիարդից ավելի
Նշենք, որ 5-րդ ծրագրի տնտեսվարողներին միանվագ դրամաշնորհ է տրամադրվում յուրաքանչյուր 5-րդ աշխատողի աշխատավարձի չափով` արդյունավետ աշխատատեղերի պահպանման նպատակով։
Հիշեցնենք, որ կառավարությունն արդեն իսկ 14 ծրագիր է հաստատել, ըստ որոնց նախատեսվում է այս կամ այն անձանց կամ ընկերություններին աջակցություն տրամադրել կորոնավիրուսի տնտեսական հետևանքների չեզոքացման համար։
