ԵՐԵՎԱՆ, 26 հունիսի – Sputnik. «Հրազդան» մարզադաշտն անգամ նորոգումից հետո չի կարող միջազգային խաղեր ընդունել։ Այսօր լրագրողների հետ զրույցում այդ մասին ասաց Հայաստանի ֆուտբոլի ֆեդերացիայի նախագահ Արթուր Վանեցյանը։
««Հրազդան» մարզադաշտը պատմություն կրող է, սակայն վերանորոգումը հսկայական գումարներ կպահանջի։ ՀՖՖ–ն չունի այդքան գումար, դրա համար պետք է այլ ներդրող: Մարզադաշտի սեփականատերն այժմ այդ ուղղությամբ աշխատանքներ տանում է: Մասնագետների գնահատմամբ, որքան էլ այն վերանորոգվի, չի կարող համապատասխանել միջազգային ստանդարտներին»,- նշեց նա:
Վանեցյանի խոսքով` իրենք չեն հրաժարվում Ազգային մարզադաշտ կառուցելու մտքից։
Հայերը Սև ծովի փոխարեն «Հրազդան» կգնա՞ն. մարզադաշտի փառավոր անցյալն ու մշուշոտ ապագան
«Ազգային մարզադաշտը Երևանից դուրս կառուցելու հիմնական պատճառն այն է, որ Երևանը շատ խիտ է կառուցապատված և եթե մեզ հաջողվի մարզում կառուցել մարզադաշտը, ապա դաշտի կողքին կկառուցվեն այլ ենթակառուցվածքներ՝ այդպիսով նպաստելով մարզերի զարգացմանը»,-ասաց նա:
Ըստ Վանեցյանի` այդ թեմայով այժմ բանակցում են պետական կառույցների հետ։
Չինացիներն ուզում են ՀՀ–ում հսկա մարզադաշտ կառուցել. ի՞նչ ճակատագիր կունենա «Հրազդանը»
