ԵՐԵՎԱՆ, 15 փետրվարի, Sputnik մամուլի ծառայություն. Sputnik. Ընթերցում նախագծի նոր մասնակիցն է թատրոնի և կինոյի դերասան, ռեժիսոր և պրոդյուսեր, Հայաստանի ժողովրդական արտիստ Միքայել Պողոսյանը։ Նա հատված է կարդում Հովհաննես Թումանյանի բանաստեղծությունից։
«Ողջունում եմ Sputnik. Ընթերցում նախագիծը, որը սմարթֆոնների ժամանակակից աշխարհում հնարավորություն է տալիս ևս մեկ անգամ հաղորդակցվել հայկական պոեզիային` Հովհաննես Թումանյանի ստեղծագործությանը։ Ականավոր հայ գրողներն ու բանաստեղծները շատ են, սակայն Թումանյանն ինձ համար հատուկ է, քանի որ, իմ կարծիքով, նա մարմնավորում է իսկական հայի կերպարը թե՛ իր ստեղծագործություններում, թե՛ կյանքում։ Նրա ստեղծագործություններն արդիական են նաև այսօր և զարմացնում են իրենց փիլիսոփայական խորությամբ, ինչը մատուցվում է պարզ ու մատչելի լեզվով»,- ասաց Միքայել Պողոսյանը։
Հայաստանում Sputnik. Ընթերցում նախագծի առաջին մասնակիցը Sputnik Արմենիայի ղեկավար Դմիտրի Պիսարենկոն էր. նա կարդաց հայտնի հայ բանաստեղծ Միքայել Նալբանդյանի «Ազատություն» բանաստեղծությունը։
Sputnik. Ընթերցում նախագիծը բազմաբևեռ, բազմագույն աշխարհում մարդկանց իրար մոտեցնելու նպատակ ունի այնպիսի ստեղծագործությունների միջոցով, որոնք հիմնարար արժեքներ են քարոզում` սեր, կյանք, շրջապատող աշխարհի գեղեցկություն։ Նախագիծը մեկնարկել է Sputnik. Ղրղըզստանում 2015 թվականի մարտին։
Ղրղըզստանի գործընկերների նախաձեռնությունը շարունակեց Sputnik. Մոլդովան։ Նոյեմբերին Sputnik. Ընթերցում նախագծին միացան Sputnik.Աբխազիան և Sputnik. Հարավային Օսեթիան։
Sputnik-ը (sputniknews.com) լրատվական գործակալություն է և ռադիո` տասնյակ երկրներում մուլտիմեդիոն տեղեկատվական ներկայացուցչություններով: Sputnik-ը ներառում է ավելի քան 30 լեզվով կայքեր, անալոգային և թվային ռադիոհեռարձակում, բջջային հավելվածներ և էջեր սոցիալական կայքերում։ Sputnik-ի լուրերը շուրջօրյա ռեժիմով թողարկվում են անգլերեն, արաբերեն, իսպաներեն և չինարեն լեզուներով:
