ԵՐԵՎԱՆ, 8 փետրվարի- Sputnik. Ջեկի Չանի նոր ֆիլմի նկարահանումները վախեցրել են լոնդոնցիներին։ Ոմանց թվացել է, թե մայրաքաղաքի կենտրոնում իրականացված պայթյունը 2005թ.-ի ահաբեկչական հարձակման կրկնությունն է։
Ինչպես հայտնում է ՌԻԱ Նովոստին, հղում անելով Associated Press գործակալությունը, բեմադրված պայթյունը տեղի է ունեցել «Օտարերկրացին» (The Foreigner) ֆիլմի նկարահանումների ժամանակ, որոնց մասնակցել են Ջեկի Չանը և Փիրս Բրոսնանը։ Պայթյունը տեղի է ունեցել Լամբեթի կամրջի վրա։
Լոնդոնցիները դժգոհել են, որ նկարահանումների մասին նախօրոք չի հայտարարվել։ Ոմանց դա հիշեցրել է 2005թ.-ի հուլիսի 7-ի իրադարձությունները, երբ ահաբեկիչները երեք գնացք և մեկ ավտոբուս էին պայթեցրել։ Ահաբեկչական գործողությունների հետևանքով մահացել էր 52 մարդ, վնասվածքներ ստացել` 700-ը։
