ԵՐԵՎԱՆ, 10 փետրվարի- Sputnik. Կանայք երբեք չեն սիրահարվում առաջին հայացքից, պնդում են բրիտանացի գիտնականները։ Հակառակ սեռի ներկայացուցիչների նկատմամբ կանանց մոտ քնքուշ զգացմունքներ ծնվում են միայն 6-րդ հայացքից, հաղորդում է rosbalt կայքը։
Գիտնականները նման եզրակացության են եկել միայնակ կանանց վարքն ուսումնասիրելու արդյունքում։
Հետազոտություններից պարզվել է, որ երբ խոսքը հարաբերություններին է վերաբերում, կանայք չեն շտապում հապճեպ որոշումներ կայացնել։ Կանանց մոտ զգացմունքներ են առաջանում միայն այն բանից հետո, երբ նրանց գլխում ստեղծվում է պոտենցիալ օբյեկտի ամբողջական պատկերը։
Տղամարդու հետ ծանոթանալիս հարաբերությունների հեռանկարները գնահատելու համար գեղեցիկ սեռի ներկայացուցիչներին միջինը պետք է 45 վայրկյան։ Սկզբում նրանք գնահատում են տղամարդու աչքերն ու դիմագծերը, որից հետո ավելի հանգամանալից են ուսումնասիրում նրան։
Հետո կանայք նայում են տղամարդու ձեռքերին՝ ստուգելու ամուսնական մատանու առկայությունը։ Եթե այն բացակայում է, կանայք հայացքն ավելի ներքև են իջեցնում` ստուգում են կոշիկները, հագուստը։ Այնուհետև գնահատում են նրա կեցվածքը, խոսքը, շարժուձևը, հասարակության մեջ իրեն պահելու ձևը, մարմնի կազմվածքը։ Հետո նայում են ձեռքերին` գնահատելու եղունգների վիճակը։ Եթե այսքանից հետո կինը գոհ է մնում նոր ծանոթից, որոշում է՝ արժե՞ արդյոք շարունակել շփումը։
Տղամարդիկ, ընդհակառակը, հակված են սիրահարվել առաջին հայացքից, քանի որ կնոջ ընկալումը նրանց մեծ մասի մոտ տեսողական է։
