ԵՐԵՎԱՆ, հունիսի 29 –Sputnik. ԱՄՆ նախագահ Դոնալդ Թրամփը հայտարարել է, որ ՌԴ գործընկեր Վլադիմիր Պուտինի հետ բանակցությունների ընթացքում բազմաթիվ պայմանավորվածություններ են ձեռք բերել, պայմանավորվել են կարգավորել առևտուրը։ Միացյալ Նահանգների առաջնորդն այս մասին ասել է «Ռոսիա 24» հեռուստաալիքի եթերում` անդրադառնալով Օսակայում G20–ի շրջանակում կայացած հանդիպմանը։
Թրամփը նշել է նաև, որ Պուտինը` «հիանալի տղա է և արտակարգ մարդ», իսկ բուն հանդիպումը նա բնութագրել է մեկ բառով` «հրաշալի էր»։
Նշենք, որ հունիսի 28-ին Պուտինի և Թրամփի հանդիպումը տևել է մոտ 1.5 ժամ։ Ռուսական կողմից բանակցություններին մասնակցել են ՌԴ արտգործնախարար Սերգեյ Լավրովը, առաջին փոխվարչապետ Անտոն Սիլուանովը, նախագահի օգնական Յուրի Ուշակովը և մամուլի քարտուղար Դմիտրի Պեսկովը։ Ամերիկյան կողմից ներկա են եղել պետքարտուղար Մայք Պոմպեոն, նախագահի` ազգային անվտանգության գծով օգնական Ջոն Բոլտոնը, Սպիտակ տան մամուլի քարտուղար Սթեֆանի Գրիշեմը, ինչպես նաև Թրամփի դուստրը` Իվանկան, և փեսան` Ջարեդ Քուշները։
Թրամփը Պուտինին խնդրել է այս անգամ չմիջամտել ԱՄՆ նախագահական ընտրություններին
Ռուսաստանի արտգործնախարար Սերգեյ Լավրովի խոսքով` զրուցակիցները վերահաստատել են ավելի վաղ ձեռք բերված պայմանավորվածությունները և հարցերի լայն շրջանակ քննարկելու ցանկություն են հայտնել ` տնտեսական հարցերից մինչև ռազմավարական կայունություն։ Պուտինի հետ հանդիպմանը Թրամփն իր թիմին կարգադրել է պայմանավորվածությունները տեղափոխել պրակտիկ գործողությունների դաշտ։ ՌԴ արտգործնախարարը նշել է, որ տրամադրվածությունը դրական է եղել, մթնոլորտը` կառուցողական։
