ԵՐԵՎԱՆ, 18 հուլիսի — Sputnik. Իսրայելի իշխանությունը ներողություն է խնդրել Երուսաղեմի հայ պատրիարքարանի ներկայացուցիչներից հայ սեմինարիստի վրա օրթոդոքս հրեաների հարձակման համար, Facebook սոցցանցի իր էջում հայտնել է Երուսաղեմի Սրբոց Հակոբյանց միաբանության անդամ հայր Հովնան Բաղդասարյանը։
Հուլիսի 16-ին Երուսաղեմի հայ պատրիարքարան են այցելել Քնեսեթի ներկայացուցիչներ ռաբբի Դավիթ Ռոզենցը, ոստիկանության սպաներ և Հագի քաղաքի միջմշակութային կենտրոնի ղեկավար Ագմոն Շնիրը։
«Հանդիպման ընթացքում նրանք ներողություն են խնդրել հունիսի 8-ին տեղի ունեցած միջադեպի համար. հայ հոգևոր սեմինարիայի սաների վրա օրթոդոքս հրեաների կողմից հարձակման համար։ Կողմերը քննարկել են, թե ապագայում ինչ միջոցներով կկարողանան նման իրավիճակները կանխել», – գրված է հաղորդագրության մեջ։
Ավելի վաղ իսրայելական ԶԼՄ–ներում տեղեկություն էր տարածվել, որ հրեաների վրա հարձակվել են հենց հայերը (60 սեմինարիստ)։ Ավելի ուշ ոստիկանությունը պարզել էր տեղի ունեցածի իրական հանգամանքները։
