ԵՐԵՎԱՆ, 13 ապրիլի – Sputnik․ Բելառուսի նախագահ Ալեքսանդր Լուկաշենկոն առողջապահության նախարար Վլադիմիր Կարանիկի, նախագահի աշխատակազմի ղեկավար Իգոր Սերգեենկոյի և Հանրապետության Խորհրդի նախագահ Նատալյա Կոչանովայի մասնակցությամբ խորհրդակցության ընթացքում հայտարարել է, որ ռուսական ԶԼՄ-ները կողմնակալ մոտեցում են ցուցաբերում Բելառուսի՝կորոնավիրուսի դեմ պայքարում ձեռնարկած միջոցառումները լուսաբանելիս։ Լուկաշենկոյի խոսքերը մեջբերում է նրա մամուլի ծառայությունը։
Նրա խոսքով՝ ԶԼՄ-ները «զզվելի տեղեկություններ» են հայտնում, թե իբր ««բատկան» կորոնավիրուսը բուժում է իր տրակտորով, օղիով ու բաղնիքով․․․»
«Գիտեք, ես մի անգամ խոսքի մեջ կատակեցի։ Բայց ամեն կատակի մեջ կատակի բաժին կա»,-ասել է Լուկաշենկոն խորհրդակցության ընթացքում։
Այնուհետև նախագահը դիմել է ռուս ժողովրդին։
Աշխարհում COVID-19 –ով վարակված ավելի քան 1,8 մլն մարդ կա․ երկրների «թեժ տասնյակը»
«Ռուսաստանցիներին կցանկանայի ասել՝ նրանք, ովքեր «լեզվին են տալիս» մեզ հետ գործ չունեն։ Մենք հո նրանցից որևէ բան չենք խնդրում։ Մենք ինքնուրույն ենք պաշտպանվում, փրկվում։ Եկեք մեզ մոտ, ինքներդ տեսեք։ Բայց ինչո՞ւ եք Ռուսաստանում մեզ որպես հիմար ներկայացնում։ Ինչո՞ւ է ռուսներին մատուցվում, թե այնտեղ՝ Արևմուտքում, այդ բելառուսները ինչ-որ աննորմալներ են»,-վրդովվել է Բելառուսի նախագահը։
Նախագահը հիշեցրել է, որ Բելառուսը Առողջապահության համաշխարհային կազմակերպությանը հատուկ հրավիրել է, որպեսզի մասնագետները գնահատեն իրավիճակը հանրապետությունում։
«Իսկ դուք չե՞ք վախենա մասնագետներին ձեր երկիր կանչել։ Ռուսների մոտ, ամերիկացիների։ Հապա գնացեք ու տեսեք, թե ինչպես են նրանք մեզ մոտ եղել։ Եվ որ նրանք (ԱՀԿ-ը) ասել են՝ բելառուսներից ոչ մի բողոք չունենք»,-ընդգծել է Լուկաշենկոն։
Հիշեցնենք, որ Առողջապահության նախարարության վերջին տվյալների համաձայն՝ համավարակի սկզբից մինչ օրս Բելառուսում 2919 մարդ է վարակվել կորոնավիրուսով։ Նրանցից 203-ը առողջացել են, գրանցվել է 29 մահվան դեպք։
