Լաչինի միջանցքի շրջափակման անկողմնակալ լուսաբանումը վճռորոշ դեր է խաղում. ԱԳՆ խոսնակ
12:04 10.08.2023 (Թարմացված է: 18:19 10.08.2023)
ԱԳՆ
© Sputnik / Andranik Ghazaryan
Բաժանորդագրվել
Անի Բադալյանն ընդգծել է, որ միջազգային լրատվամիջոցները գրում են ԼՂ–ում հումանիտար ճգնաժամի մասին ու հղում անում Լուիս Մորենո Օկամպոյին։
ԵՐԵՎԱՆ, 10 օգոստոսի – Sputnik. Լաչինի միջանցքի անմարդկային շրջափակման և Ադրբեջանի իրական նպատակի ազատ և անկողմնակալ լուսաբանումը վճռորոշ դեր է խաղում Ադրբեջանի շարունակական քարոզչության գործում: Այս մասին Twitter-ի իր էջում գրել է ՀՀ արտգործնախարարության մամուլի խոսնակ Անի Բադալյանը։
«Միջազգային լրատվամիջոցները գրում են Լեռնային Ղարաբաղում հումանիտար ճգնաժամի սրման մասին՝ հղում անելով նաև Միջազգային քրեական դատարանի նախկին դատախազ Լուիս Մորենո Օկամպոյի եզրակացություններին»,– գրել է Բադալյանն ու կից լուսանկարներ հրապարակել միջազգային ԶԼՄ–ների անդրադարձից։
Int’l media writing abt worsening humanitarian crisis in #NagornoKarabakh,also w/reference to conclusions by former ICC prosecutor @MorenoOcampo1. Free &objective coverage of inhuman blockade of #LachinCorridor & of AZ real goal play critical role agnst AZ continuous propaganda. pic.twitter.com/XoaSggTWCh
— Ani Badalyan, Spokesperson of MFA of Armenia (@ArmSpoxMFA) August 9, 2023
Նշենք, որ Արցախի նախագահ Արայիկ Հարությունյանը նամակով դիմել էր ՄՔԴ նախկին դատախազին` խնդրելով փորձագիտական կարծիք հայտնել Արցախում տիրող իրավիճակի կապակցությամբ։ Օկամպոն Արցախի նախագահ Արայիկ Հարությունյանի հետ երեկ զրուցել է տեսակապով և ներկայացրել Արցախի շրջափակման վերաբերյալ իր իրավական հետազոտության արդյունքները: Նա փաստել է, որ այժմ Ադրբեջանի կողմից ԼՂ–ում իրականացվում է տեղի հայ ժողովրդի ցեղասպանություն, և միջազգային հանրությունը պարտավոր է հրատապ ու գործուն քայլերով կանխել դրա հետագա ընթացքը։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեցին շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։
